Bólusett í þessari viku á slökkvistöðinni

Heilbrigðisstofnun Norðurlands fær 720 skammta af bóluefni frá Pfizer gegn Covid-19 í þessari viku. Þá verða þeir bólusettir öðru sinni sem fengu fyrri skammtinn 2.-5. mars en í þeim hópi eru m.a. þeir sem eru 80 ára og eldri.

Í næstu viku er gert ráð fyrir að hópur sem bólusettur var dagana 9.-11. mars fá seinni skammtinn og haldið verður áfram að bólusetja 70 til 79 ára. Stefnt er að því að klára að bólusetja árganga 1944 og 1945 og helst að byrja að bólusetja árgang 1946. Dagana 6.-9. apríl standa vonir til að halda áfram með að bólusetja, amk. árganga 1946, 1947 og 1948.

Á Akureyri fer seinni bólusetning fram á slökkvistöðinni. Fólk verður boðað með sms skilaboðum þar sem tími og staðsetning kemur fram. Þeir sem hafa ekki farsíma og fá því ekki boð með sms eru beðnir um að mæta í seinni bólusetninguna á slökkvistöðina á morgun, 23. mars, milli klukkan 13.00 og 15.00.