Ást, eftirsjá og sorg í bréfum aldraðrar konu

AF BÓKUM – 71

Ég les frekar sjaldan nútímalegar skáldsögur, en kápa bókarinnar The Correspondent greip athygli mína og ég ákvað að lesa hana án þess að vita neitt um innihald hennar. Hún kom mér ánægjulega á óvart. Dóra samstarfskona mín las hana stuttu á eftir mér og var líka mjög hrifin af bókinni, þó að við séum með frekar ólíkan bókasmekk. Fyrir fólk sem notar Goodreads fær bókin 4,54 stjörnur, sem er mjög há einkunn.

Bókin er skrifuð sem samskipti aldraðrar konu að nafni Sybil Van Antwerp í gegnum bréf og tölvupósta á níu ára tímabili. Hún gefur innsýn í starf hennar og einkalíf – ást, eftirsjá og sorg. Hún er skilin, hefur eignast þrjú börn og er komin á eftirlaun eftir margra ára starf sem aðstoðarkona dómara. Hún á erfitt með að tjá sig í tali en er mun betri í að tjá sig skriflega. Á hverjum morgni sest hún niður og skrifar bréf, ekki bara til vina og fjölskyldu heldur líka til annarra, til dæmis rithöfunda sem hún heldur upp á. Hún þróar meðal annars með sér vináttu við mann sem vinnur hjá fyrirtæki sem hún á í tölvupóstsamskiptum við. Sybil fær einnig hótunarbréf sem fær hana til að líta til baka og hugsa um ákvarðanir sem hún tók og breyttu bæði lífi hennar og annarra.

Mér fannst sérstaklega áhugavert að lesa bréfaskriftir hennar, þar sem það er ekki lengur algengt að senda bréf og eiga orð á pappír sem hægt er að lesa aftur eftir langan tíma. Bókin inniheldur bréf sem hún fær, bréf sem hún sendir og jafnvel sum sem hún skrifar en getur ekki sent.

Á Amtsbókasafninu eigum við eintak af bókinni á ensku og á Rafbókasafninu er hún til sem hljóðbók á ensku. Það væri frábært að fá þessa bók þýdda á íslensku.