20 greindust í dag, þar af 14 grunnskólabörn

Að minnsta kosti 20 manns greindust smitaðir af kórónuveirunni á Akureyri í dag, þar af 14 á grunnskólaaldri. Síðustu tvo daga hafa rúmlega 300 manns verið í sóttkví. Þetta kemur fram á Facebook síðu lögreglunnar á Norðurlandi eystra.

„Hvetjum við alla áfram til að huga vel að sinni stöðu og að forðast hópamyndanir, þá sérstaklega unga fólkið, sem virðist hvað mest vera að smitast þessa dagana,“ segir lögreglan. „Þá hvetjum við alla sem eru í forsvari fyrir einhverskonar félagasamtök og íþróttafélög að íhuga það alvarlega að slá viðburðum og æfingum á frest á meðan við í sameiningu náum vopnum okkar aftur í baráttunni við Covid.“

Lögreglan hvetur fólk til að skrá sig í sýnatöku á heilsuveira.is ef það finnur til einhverra einkenna. Sýnataka fer fram í Strandgötu 31 frá klukkan 9 til 11 alla daga vikunnar.