Pistlar

Leynimakk í dúkkuhúsi

Jóhann Árelíuz skrifar 10. ágúst 2025 | kl. 06:00

EYRARPÚKINN - 51

Í bílskúr Sigtryggs rafvirkja fundum við dollu með ógreinilegri áletrun á snjáðum miða og læstum að okkur í dúkkuhúsinu gula.

Þar nudduðum við leynifélagar glærum vökva í svörðinn samkvæmt ráðum Stebba sem lesið hafði aftan á dósina.

En stundum fer á annan veg en ætlað er því hárið varð eins og apótekaralakkrís og stóð sem strý í allar áttir.

Hvað mundu foreldrar okkar segja? Yrðum við nokkurn tíma samir aftur?

Nonni Magg fór næstum að kjökra.

Við höfðum att honum í þessa vitleysu, hann var hættur í leynifélaginu Svarta örin.

Sögðum við Jóni að hætta öllu kellingarvæli og náði Stebbi í fat með heitu vatni og grænsápu í þvottahúsið.

Spöruðum við síst sápuna en kom fyrir ekki og litum við út eins og villimenn á ströndum Nýju-Gíneu eða negrarnir í Kongó.

Móðir mín reyndi að ná herðinum úr með sjampói og gékk lítið betur en pabbi þusaði um fáráðlingaháttinn og snoddaði mig berskjaldaðri en nokkru sinni fyrr.

Jóhann Árelíuz er rithöfundur og skáld.

Leynimakk í dúkkuhúsi er kafli úr Eyrarpúkanum, gáskafullu skáldverki sem gerist á Eyrinni á Akureyri um miðja síðustu öld. Bókin kom út 2003.

Til baka í yfirlit pistla

Leynimakk í dúkkuhúsi

Hús dagsins: Norðurgata 33

Beitarkóngur á Borgum

Ber í skógi

Nokkur ráð til að líða betur í skammdeginu

Skáldkonan á Ljósavatni

Að vera góður (með sig)

Leynimakk í dúkkuhúsi

Tengdar fréttir