Jóhann Árelíuz

Rauði Skódinn

Jóhann Árelíuz skrifar 09. nóvember 2025 | kl. 06:00

EYRARPÚKINN - 64

Kalli frændi kom eins og farfuglarnir þó hann kæmi seinna og færi fyrr og spennandi að sjá hvort Kalli birtist með nýja konu upp á arminn.

Best man ég heimsókn frænda á splúnkunýjum Skóda sólarsumarið 1959.

Við Simmi mældum dumbrauða drossíuna í bak og fyrir og líktist jólaköku með rauðum sætum úr leðurlíki og doppóttu taui, sugum í okkur höfga plastangan og lékum bílstjóra og farþega glæsivagnsins.

Á framrúðuspegli hékk glansandi mynd úr stífum pappa af ungri konu með logaflóð um háls og herðar en línurnar ávalar eins og aurbretti Skódans og minnti stúlkan á Ritu Hayworth frá Hollywood sveipuð gagnsæjum vatnsbláum náttserki sem skyggði bylgjur barms og mjaðma.

Við Simmi horfðum hugfangnir á þokkafulla dísina drekkandi seðjandi ilminn sem af henni stafaði enda báðir ákveðnir í að eignast eins rauðan Skóda og Kalli frændi þegar við yrðum stórir.

Jóhann Árelíuz er rithöfundur og skáld.

Á sunnudögum síðustu misseri hefur akureyri.net birt kafla úr Eyrarpúkanum, gáskafullu skáldverki Jóhanns Árelíuzar sem gerist á Eyrinni á Akureyri um miðja síðustu öld. Bókin kom út 2003. Rauði Skódinn er kafli úr bókinni Sveskjur í sólarlaginu, síðari bók Jóhanns um Eyrarpúkann en þar segir einkum frá dvöl drengsins á æskuslóðum föður hans í Vopnafirði. Bókin kom út 2010.

Kaflar úr Eyrarpúkanum, bók Jóhanns sem kom út 2003.