Pétur læknir

EYRARPÚKINN - 36

Heimilislæknirinn mætti á Willýsjeppa, stikaði stéttina í gulbrúnum frakka með gráan hatt og brúna tösku og vantaði bara byssureykinn og rann kalt milli skinns og hörunds þegar hann hlustaði mann með svartri stólpípunni.

Kannast við þetta hvein í doska, láttu mig þekkja það, þetta fékk ég líka og varð Pétur óléttur í einni vitjan.

Svo rak hann skeið í lok og sagði Gaptu strákur og var stutt í uppsöluna.

Þótti mömmu heimilislæknirinn hrjúfur en pabbi var hrifinn því Pétur minnti hann á Árna lækni á Vopnafirði sem rak fólkið fársjúkt úr rúmunum svo fiðrik rauk úr sængum.

Jóhann Árelíuz er rithöfundur og skáld.

• Pétur læknir er kafli úr Eyrarpúkanum, gáskafullu skáldverki sem gerist á Eyrinni á Akureyri um miðja síðustu öld. Bókin kom út 2003.