Jóhann Árelíuz

Höfðingsskapur á Hofi

Jóhann Árelíuz skrifar 05. apríl 2026 | kl. 06:00

EYRARPÚKINN - 84

Einar Jónsson fékk aldrei nóg að borða í uppvextinum.

Einna elstum Hraunfellsbræðra var honum komið fyrir út í sveit og átti ekki sjö dagana sæla.

Þó tók steininn úr þegar hann réði sig í vinnumennsku að prestssetrinu á Hofi.

Hraus mér hugur við þeim lýsingum undir dúnsæng mömmu.

Eitt sinn nær jólum og piltarnir hálfærir af sulti komust þeir yfir reykt kjötstykki undir skemmurjáfri. Sigruðu myrkrið og maginn samviskuna og gleyptu þeir í sig kjötið hrátt.

Von bráðar komst upp um verknaðinn enda guðsmaðurinn gætinn veraldlegra gnægta og ekki frítt við að séra Jakobi væri skemmt þegar hann tilkynnti piltunum að þeir hefðu lagt sér til munns reykt hundakjöt sem prestur ætlaði í hákarlabeitu.

Ældu vinnumenn kjötinu milli þúfna en kom ekki að sök því hundar prests rifu það í sig.

Var piltunum refsað fyrir verknaðinn og minnkað enn við þá í mat um sinn.

Jóhann Árelíuz er rithöfundur og skáld.

Á sunnudögum um langa hríð birti akureyri.net kafla úr Eyrarpúkanum, gáskafullu skáldverki Jóhanns Árelíuzar sem gerist á Eyrinni á Akureyri um miðja síðustu öld. Bókin kom út 2003. Höfðingsskapur á Hofi er kafli úr bókinni Sveskjur í sólarlaginu, síðari bók Jóhanns um Eyrarpúkann en þar segir einkum frá dvöl drengsins á æskuslóðum föður hans í Vopnafirði. Bókin kom út 2010.

Kaflar úr Eyrarpúkanum, bók Jóhanns sem kom út 2003.