Jóhann Árelíuz

Búskapur á Hraunfelli

Jóhann Árelíuz skrifar 29. mars 2026 | kl. 06:00

EYRARPÚKINN - 83

Þegar ég hlustaði á pabba segja frá barndómnum uppi á Hraunfelli sá ég bræðurnar fyrir mér snuðrandi um hlaðið eins og yrðlinga í leit að hverju því hæti sem að gagni mætti koma í búskapnum.

Mér birtist lágreistur torfbær með örlitlum ljóra og það fraus á koppnum þó blessuð kýrin jórtraði undir baðstofunni.

En það var nóg að gera og margar hendur á lofti þegar skíturinn var borinn í fanginu út úr fjárhúsunum og síðar klofinn og reistur upp til þurrks.

Svo rigndi í skítinn og þá þurfti að bera hann inn í húsin til að geta borið hann út aftur, reist upp og þurrkað.

Stákarnir reyttu gras með höndunum á Hraunfelli, þar var aldrei ullarlagð að sjá, reyndu við fiska og fugla og biðu betri tíma með sultardropa í nefi.

Jónas yrkir

Bóndi er bústólpi
bú er landstólpi
því skal hann virður vel.

Jóhann Árelíuz er rithöfundur og skáld.

Á sunnudögum um langa hríð birti akureyri.net kafla úr Eyrarpúkanum, gáskafullu skáldverki Jóhanns Árelíuzar sem gerist á Eyrinni á Akureyri um miðja síðustu öld. Bókin kom út 2003. Búskapur á Hraunfelli er kafli úr bókinni Sveskjur í sólarlaginu, síðari bók Jóhanns um Eyrarpúkann en þar segir einkum frá dvöl drengsins á æskuslóðum föður hans í Vopnafirði. Bókin kom út 2010.

Kaflar úr Eyrarpúkanum, bók Jóhanns sem kom út 2003.