Viðgerð hafin á Maríu Júlíu

Nú er hafin vinna við hið sögufræga skip Maríu Júlíu, en skipið var dregið frá Ísafirði til Akureyrar í lok mars. 

• Þór dró hina sögufrægu Maríu Júlíu til Akureyrar | akureyri.net

Í frétt Rúv um viðgerð skipsins er rætt við Garðar Jóhannesson, verkefnisstjóra í Slippnum á Akureyri, um verkefnið sem nú er fyrir höndum. Verkefni Slippsins á Akureyri er að taka vélina, stýrishúsið og allan stálbúnað úr skipinu, færa það í slipp, gera við botninn sem þarf að gera, mála hann og kalfakta, það er að þétta allan botninn, að því er kemur fram í viðtali Rúv við Garðar. Skipið verður síðan dregið til Húsavíkur þar sem fram fer timburvinna á efra dekki og fleira.

Viðgerð skipsins er mikið verk, en að því standa Hollvinasamtök Maríu Júlíu sem stofnuð voru á Ísafirði fyrir nokkrum misserum. Undir lok liðins árs komst loks skriður á málið og skipti fjárframlag frá ríkissjóði að upphæð 15 milljónir króna miklu fyrir framvindu verksins, að því er fram kemur í fréttinni.