Umræðan

Vél Transavia var snúið til Egilsstaða í morgun

Skapti Hallgrímsson skrifar 17. júlí 2025 | kl. 10:30

Mikil gosmóða mældist á Akureyri í morgun að því er segir á vef Umhverfis- og orkustofnunar. Það er væntanlega móðan sú arna sem þarna hylur skemmtiferðaskipið Mein Schiff við Tangabryggju. Mynd: Skapti Hallgrímsson

Flugvél Transavia sem kom frá Amsterdam í morgun og átti að lenda á Akureyri var snúið til Egilsstaða. Vélin gat ekki lent vegna lélegs skyggnis. Ef til vill má segja að það hafi verið mjög lágskýjað en gosmóðu má líklega kenna um, a.m.k. að einhverju leyti. „Mikil gosmóða hefur mælst á Akureyri og Ísafirði síðan í nótt og ský gosmóðu virðist liggja yfir stórum parti Norðurlands, Vestfjarða og fleiri staða,“ segir á vef Umhverfis- og orkustofnunar í morgun.

Samkvæmt vef Isavia átti vél Transavia að lenda á Akureyrarflugvelli um klukkan 9.30 og er reyndar enn sögð á áætlun. Á vefnum kemur fram að vél Icelandair frá Reykjavík lenti á Akureyri kl. 9.32.