Þotur easyJet komnar á kreik á nýjan leik

Áætlunarflug breska félagsins easyJet á milli Akureyrar og Bretlands hófst á ný í dag eftir sumarhlé þegar þota félagsins kom frá London. Vélin lenti klukkan rúmlega níu og var farin aftur laust fyrir klukkan ellefu. Þetta er þriðji veturinn sem easyJet flýgur á milli Akureyrar og Bretlands.

Eins og síðasta vetur mun easyJet fljúga á milli Gatwick flugvallar í London og Akureyrar alla þriðjudaga og laugardaga út apríl og sömu daga á milli Akureyrar og Manchester frá því um miðjan nóvember til loka marsmánaðar.

Eftir áramót verður einnig í boði beint flug frá Akureyri til Zürich í Sviss á vegum ferðaskrifstofunnar Kontiki – á sunnudögum, í febrúar og mars – og með Voight Travel til Amsterdam í Hollandi á laugardögum frá miðjum janúar fram í miðjan mars og hluta tímans einnig á þriðjudögum.