Þórsarar bjóða upp á vöfflur og súkkulaði

Íþróttafélagið Þór býður upp á vöfflur með rjóma og rjúkandi súkkulaði á föstudögum á aðventunni eins og síðustu ár. Fyrsta boðið að þessu sinni verður í dag.

Eins og mörg undanfarin ár taka fyrrum formenn Íþróttafélagsins Þórs sig til og standa vaktina við vöfflujárnin í desember, segir í tilkynningu frá félaginu; nú föstudagana 5., 12. og 19. desember.

„Það verða þau Árni Óðinsson, Þóra Pétursdóttir, Sigfús Helgason og svo núverandi formaður, Nói Björnsson sem taka þá móti gestum í Hamri frá kl 9.00 til kl 12.00 á föstudögum á aðventunni. Allir hjartanlega velkomnir að koma og gæða sér á rjúkandi vöfflum með sultutaui og drekka heitt súkkulaði með. Finnum jólaandan blandast saman við ilminn úr eldhúsinu í Hamri í desember,“ segir í tilkynningu Þórsara.