Þórs-gervigrasið lagt og stúkan komin

Síðustu mánuði hafa staðið yfir framkvæmdir á félagssvæði Íþróttafélagsins Þórs á Akureyri en unnið hefur verið að því að útbúa gervigrasvöll austan núverandi grasvallar. Mikilvægur áfangi í þeim framkvæmdum hófst í morgun, þegar byrjað var að leggja sjálft gervigrasið á völlinn.

Grasvöllurinn á svæðinu hefur þolað illa mikla notkun undanfarinna ára og er það illa farinn að bæði karlalið Þórs og kvennalið Þórs/KA hafa leikið heimaleiki sína inni í Boganum í sumar. Til stóð að nýi gervigrasvöllurinn yrði kominn í gagnið fyrr í sumar en framkvæmdir við hann töfðust af ýmsum orsökum.

• Frétt akureyri.net frá því í júlí, þegar tafir á framkvæmdum ollu áhyggjum:

Gervigrasvöllurinn verður klár í haust

Þórsarar reisa sjálfir til stúku við völlinn

Um er að ræða knattspyrnuvöll í fullri stærð, ásamt æfingasvæði, og verður allt svæðið upplýst og flóðlýst. Síðsumars hefur verið unnið af miklum krafti í framkvæmdum við völlinn og mikilvægt var að ná að leggja gervigrasið á hann fyrir veturinn. Austan vallarins verður 500 manna áhorfendastúka staðsett, sambærileg þeirri sem er við núverandi keppnisvöll KA. Stúkan er komin til landsins og er klár til uppsetningar þegar jarðvinnu og graslagningu lýkur, að því er segir í frétt á heimasíðu Þórs.

Allt bendir því til þess að völlurinn verði tilbúinn til notkunar nú í haust og að bæði Þór og Þór/KA geti þá leikið heimaleiki sína í efstu deild karla og kvenna næsta sumar á þessum nýja og glæsilega velli.