Þór tekur á móti Fram og SA-konur leika syðra

Karlalið Þórs í handknattleik fær Íslandsmeistara Fram í heimsókn í dag í Olís deildinni, efstu deild Íslandsmótsins og kvennalið Skautafélags Akureyrar leikur gegn Fjölni i Reykjavík

Leikur Þórs og Fram í dag er sá síðasti í 13. umferð deildarinnar. Þórsarar eru í 10. sæti með sjö stig eftir 12 umferðir en ÍR-ingar eru neðstir með fimm. HK er með átta stig, Selfoss níu og Framarar með 10. Alls eru leiknar 22 umferðir áður en átta liða úrslitakeppni hefst í vor.

• Olísdeild karla í handknattleik
  Íþróttahöllin á Akureyri kl 17
  Þór - Fram

Þórsarar töpuðu á útivelli fyrir neðsta liði deildarinnar, ÍR, í 12. umferðinni, en Fram tapaði 30:28 á heimavelli fyrir FH.  Þór sótti Fram heim í fyrri umferðinni um miðjan september og þar höfðu Framarar betur, 37:29.

Staðan í deildinni

Kvennalið SA í íshokkí er í efsta sæti Toppdeildarinnar með 19 stig eftir sjö leiki. SA hefur unnið alla leiki sína til þessa, þar af tvo í framlengingu. Fjölnir er í neðsta sætinu án stiga það sem af er úr sex leikjum.

• Toppdeild kvenna í íshokkí
  Egilshöllin kl. 16:45
  Fjölnir - SA

SA og Fjölnir hafa mæst þrisvar það sem af er leiktíðinni og allir leikirnir endað með fimm marka sigri SA, 5-0 á útivelli og 6-1 og 5-0 á heimavelli.