Þór semur við Ágúst Eðvald Hlynsson

„Knattspyrnudeild Þórs og Ágúst Eðvald Hlynsson hafa gert með sér samkomulag um að Ágúst gangi til liðs við Þór um áramótin og mun Ágúst því snúa aftur heim í Þorpið eftir þrettán ára fjarveru.“

Þannig hefst tilkynning sem Þórsarar birtu á miðlum sínum í kvöld. Þór sigraði í sumar í Lengjudeildinni, næst efstu deild Íslandsmótsins, og leikur því í Bestu deildinni á ný næsta sumar. Ágúst Eðvald er 25 ára sókndjarfur miðjumaður og er annar leikmaðurinn sem gengur til liðs við Þór um helgina. Í gær var greint frá því að Atli Sigurjónsson væri á heimleið.

Tilkynning knattspyrnudeildar Þórs hljóðar svo í heild:

„Knattspyrnudeild Þórs og Ágúst Eðvald Hlynsson hafa gert með sér samkomulag um að Ágúst gangi til liðs við Þór um áramótin og mun Ágúst því snúa aftur heim í Þorpið eftir þrettán ára fjarveru.

Ágúst, sem er fæddur árið 2000, kemur til Þórs frá Vestra þar sem hann varð bikarmeistari í sumar en Ágúst hefur einnig leikið með Breiðablik, Víking, FH og Val í efstu deild hér á landi og hefur leikið alls 116 leiki í efstu deild og skorað 23 mörk.

Hann hefur einnig leikið erlendis, var á mála hjá unglingaliðum Norwich og Brøndby 2017-2019 og hefur leikið með Horsens og AB í Danmörku. Þá á Ágúst 35 landsleiki að baki fyrir yngri landslið Íslands og hefur skorað 5 mörk í þeim leikjum.

Ágúst þekkir vel til í Þorpinu því hér ólst hann upp en Ágúst lék með yngri flokkum Þórs upp í 5. flokk. Þá fluttist fjölskyldan búferlum í höfuðborgina og Ágúst hóf að æfa með Breiðablik.

Við bjóðum Ágúst velkominn heim í Þorpið og hlökkum til að sjá hann í baráttunni í Bestu deildinni með okkar mönnum.“

Þórsarar birtu í kvöld skemmtilegt myndband frá ferli Ágústs Eðvalds á Instagram. Smellið hér til að horfa.

• Frétt gærdagsins:  Atli Sigurjónsson kominn heim í Þór