Sveinn Margeir farinn en Rømer kominn

Knattspyrnumaðurinn Sveinn Margeir Hauksson, sem leikið hefur með KA í sumar í láni frá Víkingi, er farinn aftur í herbúðir Víkinga. Hins vegar hefur KA samið við hinn reynslumikla Dana André Rømer, sem er þegar kominn til Akureyrar og mættur á æfingu hjá liðinu.

Upphaflega stóð til að Sveinn Margeir léki með KA út þetta tímabil en vegna meiðsla í herbúðum Víkings og þátttöku liðsins í Evrópukeppni var ákveðið að kalla hann til baka úr láni. Sveinn Margeir hefur komið við sögu í 12 deildarleikjum og tveim bikarleikjum með KA í sumar og skorað fjögur mörk. Þar af komu tvö þeirra í síðasta leik hans fyrir félagið, þegar KA bar sigurorð af ÍA 3:2 um síðustu helgi.

André Rømer er 33 ára og lék síðast með Randers en þar sem samningur hans er útrunninn þarf KA ekki að greiða fyrir hann. Rømer er varnarsinnaður miðjumaður, sem ætlað er að leysa hlutverk Spánverjans Rodri í liði KA en Rodri leikur ekki meira með liðinu í sumar vegna meiðsla. Rømer er afar reynslumikill og á að baki um 370 leiki í efstu deild í Danmörku og Svíþjóð, auk 30 Evrópuleikja. Hann hefur orðið danskur meistari í þrígang og einu sinni bikarmeistari þar í landi. André er yngri bróðir Marcel Rømer, sem lék með KA síðari hluta keppnistímabilsins í fyrra.