Stjarnan lagði Þór/KA 3:2 í jöfnum leik

Þór/KA beið lægri hlut gegn Stjörnunni á útivelli í efstu deild kvenna í knattspyrnu í kvöld. Lokatölur urðu 3:2 heimaliðinu í vil en miðað við gang leiksins hefði Þór/KA átt skilið stig úr þessari viðureign.

Stjarnan náði forystunni í leiknum strax á 6. mínútu þegar Þór/KA reyndi að spila út frá eigin vítateig en Stjarnan pressaði vel og þær náðu knettinum. Boltinn barst inn í teig og hrökk þar þvert yfir teiginn þar sem Fanney Lísa Jóhannesdóttir kom á ferðinni og setti boltann upp í markhornið.

Framan af leik réði Stjarnan gangi mála að mestu og voru grimmari á boltann. En Þór/KA náði smám saman að eflast og komast betur inn í leikinn. Á 28. mínútu átti Karen María Sigurgeirsdóttir gott skot af löngu færi sem Bridgette Nicole Skiba í Stjörnumarkinu náði að blaka yfir markið. Þór/KA jafnaði metin í 1:1 á 36. mínútu þegar María Dögg Jóhannsdóttir átti sendingu frá miðlínu úti hægra megin inn í vítateig Stjörnunnar, þar sem Bríet Jóhannsdóttir náði að skjóta sér fram fyrir varnarmann og pota boltanum framhjá Bridgette í markinu í fjærhornið. Vel að verki staðið hjá Bríet sem sýndi þarna ákveðni og grimmd í að ráðast að boltanum. Rétt fyrir leikhlé fékk Fanney Lísa, markaskorari Stjörnunnar, góða stungusendingu inn fyrir vörnina og var á auðum sjó gegn Allie Augur í markinu. Hún lyfti boltanum hins vegar bæði yfir Allie og markið. 1:1 var staðan í leikhléi.

Stjarnan skoraði úr báðum færum  sínum eftir hlé

Jafnræði var með liðunum mestanpart seinni hálfleiks en Stjarnan náði að skora tvö mörk úr tveimur færum fyrri hluta hálfleiksins. Á 57. mínútu skallaði Snædís María Jörundsdóttir boltann af krafti í mark Þórs/KA, eftir góða sendingu af hægri kanti. Á 65. mínútu breyttist staðan í 3:1 þegar löng sending frá hægri barst út í vítateiginn vinstra megin hjá Þór/KA. Þar var Hulda Hrund Arnarsdóttir alein á auðum sjó og lagði boltann í fjærhornið framhjá Allie í markinu. Þór/KA hafði átt síst minna í leiknum eftir hlé og óhætt að segja að mörkin hafi komið gegn gangi leiksins.

Eftir markið reyndi Þór/KA að sækja en Stjarnan varðist vel og skipulega, auk þess sem oft vantaði herslumuninn hjá Þór/KA að koma sendingum á samherja þegar álitlegir sóknartilburðir nálguðust vítateig heimaliðsins. Á 84. mínútu kom þó gott færi þegar Erin Flurey komst inn í vítateig Stjörnunnar hægra megin af miklu harðfylgi, renndi boltanum inn á markteig þar sem Bríet Jóhannsdóttir var í dauðafæri. Skot hennar fór hins vegar beint á Bridgette í markinu.

Ágæt frammistaða hjá Þór/KA en engin uppskera

Á fyrstu mínútu uppbótartíma minnkaði Erin Flurey metin í 3:2 með marki úr vítaspyrnu, sem dæmd var eftir að brotið var á henni inni í vítateig. Leikmenn Þórs/KA reyndu síðan allt hvað þær gátu til að jafna metin, minnugar fyrri viðureignar liðanna í sumar þegar þær náðu 2:2 jafntefli á síðustu stundu. Í dag gekk það ekki og 3:2 tap staðreynd – í leik þar sem jafntefli hefðu verið sanngjörn úrslit. Talsverð batamerki hafa verið á leik Þórs/KA í síðustu leikjum og liðið hafði náð í 7 stig í síðustu þremur leikjum. Þótt ekkert stig hafi komið í pokann í dag hefði frammistaðan engu að síður verðskuldað einhverja uppskeru.

Fram sigraði Þrótt 1:0 í kvöld þannig að Þór/KA er í neðsta sætinu á ný. Fram hefur nú 10 stig að loknum 11 leikjum en Þór/KA er með 9 stig, einnig eftir 11 leiki. Næsti leikur liðsins er heimaleikur gegn ÍBV næstkomandi sunnudag.

Leikskýrslan á vef KSÍ

Staðan í deildinni