Umræðan

Sunna Hlín vill áfram leiða lista Framsóknar

Skapti Hallgrímsson skrifar 09. janúar 2026 | kl. 17:00

Sunna Hlín Jóhannesdóttir, oddviti Framsóknar á Akureyri, hefur ákveðið að gefa aftur kost á sér í efsta sæti lista flokksins fyrir kosningar til bæjarstjórnar í vor. Þetta kemur fram í yfirlýsingu sem Sunna Hlín sendi frá sér í dag.

Yfirlýsingin er svohljóðadi:

Að vel ígrunduðu máli hef ég ákveðið að gefa aftur kost á mér til að leiða lista Framsóknar á Akureyri í sveitarstjórnarkosningunum í vor.
Ég hef á einn eða annan hátt komið að sveitarstjórnarmálum í 12 ár og ég finn að enn eru málefni sem á mér brenna og ég vil beita mér fyrir af meiri krafti. Ég vil áfram leggja sérstaka áherslu á húsnæðismál, málefni barna og ungmenna, vaxandi hóp eldri borgara og síðast en ekki síst atvinnumál.
Við þurfum að horfa markvisst til framtíðar og byggja upp samkeppnishæft samfélag með fjölbreyttum atvinnutækifærum, góðum skólum, góðri aðstöðu til útivistar og íþróttaiðkunar og skapa skemmtilegt mannlíf.
Eins þurfum við sem kjörnir fulltrúar landsbyggðanna að berjast fyrir okkar, standa vörð um öfluga heilbrigðisþjónustu, öruggar samgöngur, uppbyggingu skóla og hjúkrunarheimila, millilandaflug og jöfn tækifæri í atvinnulífi.

Ég hlakka til samtals við bæjarbúa um framtíð Akureyrarbæjar. Það eru spennandi tímar framundan

Til baka í umræðuna