Umræðan

Opna Norðlenska að hefjast – KA-Þór í kvöld

Valur Sæmundsson skrifar 12. ágúst 2026 | kl. 06:00

Þór og KA mættust síðast í lokaumferð deildarkeppni Íslandsmótsins í Höllinni um miðjan mars. Þá gerðu liðin jafntefli og aðeins hitnaði í kolunum eins og gjarnan vill verða í þessum rimmum. Mynd: Ármann Hinrik

Handknattleikslið KA, Þórs og KA/Þórs verða öll í eldlínunni næstu daga þegar hið árlega Opna Norðlenska fer fram í KA-heimilinu. Mótið hefst á Akureyrarslag strax í kvöld, miðvikudaginn 12. ágúst, þegar KA og Þór mætast klukkan 18:30.

Íslandsmótið hefst í byrjun september og þetta mót er fastur liður í undirbúningnum.

Þrjú lið taka þátt í hvorum flokki. Í karlaflokki leika KA og Þór ásamt ÍR en í kvennaflokki er KA/Þór, ÍR og Afturelding.

Bæði Akureyrarliðin leika í efstu deild Íslandsmótsins, Olís-deildinni, á komandi tímabili en ÍR-ingar, þriðja karlalið mótsins, verða í næst efstu deild, Grill 66-deildinni.

Kvennalið KA/Þórs hefur leik annað kvöld, fimmtudagskvöld, þegar liðið mætir Aftureldingu klukkan 20:00. Afturelding leikur í Grill 66-deildinni í vetur en KA/Þór og ÍR verða í Olís-deildinni.

Á föstudag leikur KA/Þór gegn ÍR klukkan 18:30, og tveimur tímum síðar mætir Þór karlaliði ÍR. KA og ÍR eigast síðan við í karlaflokknum klukkan 11:30 á laugardagsmorgun og mótinu lýkur klukkan 13.30 með viðureign ÍR og Aftureldingar í kvennaflokki.

Frítt er á mótið í boði Norðlenska.

Miðvikudagur 12. ágúst