Fjórði heimasigur Þórs/KA í röð

Þór/KA lagði Fram að velli 2:0 í 14. umferð efstu deildar kvenna í knattspyrnu, Bestu deildinni, í kvöld. Leikið var á gervigrasvelli Þórs á Ásnum, VÍS vellinum, og þetta var fjórði heimaleikurinn í röð sem Þór/KA vinnur. Liðið er nú aðeins einu stigi frá Fram í 6. sæti deildarinnar, sem er síðasta sætið í efri hluta deildarinnar áður en henni verður skipt upp.

Bæði liðin hafa rétt verulega úr kútnum eftir erfiða byrjun í deildinni. Fyrir þennan leik hafði Fram t.d. unnið fjóra leiki í röð og verið á mikilli siglingu. Þór/KA hefur sömuleiðis halað inn stig að undanförnu, unnið sig upp úr botnsætinu, og leikur liðsins hefur batnað til mikilla muna frá fyrstu umferðum mótsins.

Fyrri hálfleikurinn í kvöld einkenndist af mikilli baráttu og hvorugt liðið náði afgerandi tökum á leiknum. Markverðir liðanna, Alessandra Augur hjá Þór/KA og Ashley Brown Orkus hjá Fram, þurftu hvor um sig að verja frekar auðveld skot sem komu utan vítateigs, alveg þangað til á lokamínútu hálfleiksins. Þá var klafs í vítateig Þórs/KA, boltinn barst til Söru Svanhildar Jóhannsdóttur við vítateigslínuna og Allie í markinu þurfti að hafa fyrir því að bjarga skoti hennar í horn. Í aðdragandanum vildu Framarar meina að boltinn hefði farið í hönd leikmanns Þórs/KA inni í vítateig, og höfðu eitthvað til síns máls, en Sveinn Arnarsson dómari gaf lítið fyrir það.

Þór/KA með yfirhöndina í seinni hálfleik

Seinni hálfleikur var öllu líflegri og Þór/KA náði forystunni á 53. mínútu. Þór/KA fékk aukaspyrnu rétt innan miðlínu og Hildur Anna Birgisdóttir sendi langan bolta inn í vítateig Fram. Ashley markvörður kom út og hugðist grípa knöttinn en náði ekki taki á honum í baráttu við Örnu Sif Ásgrímsdóttur. Karen Hulda Hrafnsdóttir var ákveðnust allra, réðst að boltanum og náði að pota honum í markið framhjá varnarmönnum Fram. Frábær samvinna hjá miðvörðum Þórs/KA og fyrsta mark hinnar 17 ára Karenar í efstu deild. Ashley vildi meina að brotið hafi verið á sér en Sveinn dómari lét sér fátt um finnast sem fyrr.

• 1-0 - Karen Hulda Hrafnsdóttir á 53. mínútu
  Fyrra markið séð í gegnum linsuna hjá Ármanni Hinrik. Hildur Anna Birgisdóttir tók aukaspyrnu á vinstri kantinum, sendi háan bolta inn í teiginn þar sem Arna Sif Ásgrímsdóttir og Ashley Brown Orkus, markvörður Fram, stukku upp í boltann. Að lokum barst boltinn til Karenar Huldu Hrafnsdóttur sem kom honum í markið. 

Framarar virtust slegnir út af laginu við markið og Þór/KA gekk á lagið. Baráttan var til fyrirmyndar og leikur liðsins hefur vaxið mjög undanfarnar vikur. Betur gengur að halda boltanum innan liðsins en í framan af mótinu, sjálfstraust leikmanna hefur vaxið og skyndisóknirnar eru hraðar og vel útfærðar. Erin Flurey var einmitt í góðu færi í miðjum vítateignum á 62. mínútu en þrumaði boltanum yfir markið. Stuttu síðar skallaði María Dögg Jóhannesdóttir boltann í markið af stuttu færi eftir vel útfærða hornspyrnu en aðstoðardómarinn flaggaði rangstöðu. Leit út fyrir að vera tæpt.

Amalía Árnadóttir komst í gott færi á 69. mínútu eftir enn eina snögga sóknina en skotið fór beint á Ashley í markinu. Þór/KA var áfram með tök á leiknum og Framarar virtust aldrei líklegir til að jafna. Erin Flurey gulltryggði síðan sigurinn á 84. mínútu eftir frábæra skyndisókn. Framarar tóku hornspyrnu, hún var illa útfærð og boltinn fór beint til Erin Flurey við vítateig Þórs/KA. Hún kom boltanum á Hildi Önnu sem geystist upp vinstri kantinn og sendi boltann á hárréttum tíma á Margréti Árnadóttur. Margrét renndi honum á Erin, sem skyndilega var komin fremst, fíflaði varnarmenn Fram upp úr skónum og var komin ein á auðan sjó í vítateignum. Varla voru nema 20 sekúndur liðnar frá því Fram tók hornið þangað til Erin þrumaði boltanum í markið framhjá Ashley. Stórglæsileg sókn og verðskuldaður sigur í höfn.

• 2-0 - Erin Flurey á 84. mínútu
  Seinna markið séð í gegnum linsuna hjá Ármanni Hinrik. Stutt hornspyrna Fram endaði með því að Erin Flurey fékk boltann rétt utan vítateigs Þórs/KA, kom honum á vinstri kantinn þar sem Hildur Anna Birgisdóttir fór áfram á sprettinum, hún kom boltanum á Margréti Árnadóttur inni á miðjunni, Margrét sendi áfram upp vinstra megin og þar var Erin skyndilega komin í fremstu víglínuna. Hún lék laglega á varnarmenn Fram og kom boltanum í netið.

Mikil barátta um að ná sæti í efri hlutanum

Afar mikilvægur sigur hjá Þór/KA og liðið hefur svo sannarlega svarað fyrir slaka frammistöðu í upphafi móts með mjög sannfærandi hætti undanfarið. Til marks um það þá fékk liðið á sig 19 mörk í fyrstu 7 umferðunum en í síðustu 7 umferðum hefur liðið bara fengið á sig 6 mörk. Þótt enn sé stutt á milli liðanna í neðri hluta deildarinnar þá hefur bilið upp í efri hlutann líka minnkað mikið. Eftir tvískiptingu deildarinnar munu sex efstu liðin leika í efri hlutanum en fjögur neðstu í þeim neðri. Eftir þennan sigur er Þór/KA komið upp í 7. sætið og Fram er aðeins einu stigi á undan í 6. sætinu. Enn eru fjórar umferðir eftir þangað til deildinni verður skipt, þannig að allt getur gerst.

Næsti leikur Þórs/KA er á útivelli gegn Víkingi næstkomandi föstudag. Síðasti tapleikur Þórs/KA á heimavelli var einmitt 6:4 tap gegn Víkingi í lok maí. Síðan þá hefur gengi liðanna verið ólíkt – Þór/KA klifrað upp töfluna en Víkingur sigið sífellt neðar og situr nú í botnsæti deildarinnar.

Þór/KA: Alessandra Dorothy Augur - Angela Mary Helgadóttir, Karen Hulda Hrafnsdóttir, Arna Sif Ásgrímsdóttir, María Dögg Jóhannesdóttir - Margrét Árnadóttir, Elizabeth Moore, – Hulda Ósk Jónsdóttir (Birgitta Rún Finnbogadóttir 72.), Hildur Anna Birgisdóttir, Amalía Árnadóttir (Agnes Birta Stefánsdóttir 78.)  - Erin Flurey (Emelía Blöndal Ásgeirsdóttir 92.).

Leikskýrslan á vef KSÍ

Staðan í deildinni