Ofurhelgi í íshokkí og ýmislegt fleira

Íþróttafólkið byrjar árið af krafti, íshokkí, körfubolti og blak að baki fyrstu helgi ársins og fram undan eru fjölmargir kappleikir, meðal annars önnur Ofurhelgi ÍHÍ í Toppdeild karla í íshokkí, þar sem karlaliðin þrjú mætast í Skautahöllinni á Akureyri á föstudag, laugardag og sunnudag. Kvennalið Akureyrar í handboltanum, KA/Þór, keyrir af stað um komandi helgi eftir jólafrí, en karlaliðin eru í löngu leikjahléi vegna Evrópumótsins.

Þá eru á dagskrá fjölmargir leikir í Kjarnafæðimótinu í knattspyrnu, en hér skal áréttað eins og áður að tímasetningar eru birtar með fyrirvara því breytingar á leikjadagskránni eru tíðar. 

MIÐVIKUDAGUR 7. JANÚAR - körfubolti, fótbolti

Kvennalið Þórs í körfuknattleik mætir til leiks á miðvikudag eftir jólafrí og sækir B-lið Stjörnunnar heim í Garðabæinn. Þór hefur unnið alla níu leiki sína til þessa og fer nú af stað í seinni umferð deildarinnar. Stjarnan b vann einn leik í fyrri umferð mótsins. Þór vann fyrri leik liðanna þegar þau mættust á Akureyri í október með 67 stiga mun, 112-45.

• 1. deild kvenna í körfuknattleik
  Garðabær kl. 18:15
  Stjarnan b - Þór

- - -

Keppni í riðlunum í A-deild karla í Kjarnafæðimótinu er langt komin, tveir leikir eftir í hvorum riðli, og klárast riðlarnir um komandi helgi. 

• Kjarnafæðimótið í knattspyrnu, A-deild karla
  Boginn kl. 20:30
  KA2 - Magni

FIMMTUDAGUR 8. JANÚAR - íshokkí, fótbolti

Kvennalið SA í íshokkí hefur í nógu að snúast í upphafi árs og strax fimmtudaginn 8. janúar er komið að þriðja leik liðsins á árinu og um leið þriðja leik liðsins gegn Fjölni á innan við viku. Í þetta skiptið sækja SA-konur Fjölni heim í Egilshöllina á fimmtudag.

• Toppdeild kvenna í íshokkí
  Egilshöll kl. 19:45
  Fjölnir - SA

- - -

Áfram er leikið í Kjarnafæðimótinu, leikur í B-deildinni á dagskrá á fimmtudag. 

• Kjarnafæðimótið í knattspyrnu, B-deild karla
  Greifavöllur kl. 20
  Hamrarnir - Þór3

FÖSTUDAGUR 9. JANÚAR - fótbolti, körfubolti, íshokkí

Áfram er leikið í Kjarnafæðimótinu, leikur í B-deildinni á dagskrá á föstudag. 

• Kjarnafæðimótið í knattspyrnu, B-deild karla
  Greifavöllur kl. 18
  KA3 - Tindastóll

- - -

Karlalið Þórs í körfunni byrjar árið á tveimur útileikjum og komið að heimsókn í Kópavoginn á föstudagskvöld. Árið byrjar bratt því eftir heimsókn til toppliðs Sindra á Hornafirði í fyrsta leik ársins sækja Þórsarar liðið í 3. sæti deildarinnar heim á föstudagskvöld. Breiðablik vann níu leiki í fyrri hluta deildarinnar, eins og Sindri og Höttur, en tapaði fyrsta leik sínum á nýju ári og er nú einum sigri á eftir Sindra og Hetti.

• 1. deild karla í körfuknattleik, 13. umferð
  Smárinn í Kópavogi kl. 19:15
  Breiðablik - Þór

- - -

Íshokkísambandið bryddaði upp á þeirri skemmtilegu nýjung í haust að setja á þrjár svokallaðar Ofurhelgar í Toppdeild karla í íshokkí. Meistaraflokksliðin þrjú mætast þá sömu helgina á sama stað, fyrst í Egilshöllinni í haust og um komandi helgi er komið að Akureyringum að vera gestgjafar. SA mætir Fjölni í fyrsta leik Ofurhelgarinnar á föstudagskvöld.

• Toppdeild karla í íshokkí, Ofurhelgi 2
  Skautahöllin á Akureyri kl. 19:45
  SA - Fjölnir

LAUGARDAGUR 10. JANÚAR - fótbolti, handbolti, íshokkí

Línur eru að skýrast í riðlunum í A-deild karla í Kjarnafæðimótinu. 

• Kjarnafæðimótið í knattspyrnu, A-deild karla
  Húsavíkurvöllur kl. 12
  Völsungur - KA

- - -

Annar leikur Þórs/KA í kvennadeild Kjarnafæðimótsins er settur á Húsavíkurvöll kl. 14:30 á laugardag.

• Kjarnafæðimótið í knattspyrnu, Kvennadeild
  Húsavíkurvöllur kl. 14:30
  Völsungur - Þór/KA

- - -

Áfram er leikið í B-deild karla í Kjarnafæðimótinu um komandi helgi.

• Kjarnafæðimótið í knattspyrnu, B-deild karla
  Boginn kl. 15
  KA4 - Höttur

- - -

KA/Þór keyrir handboltaárið í gang um komandi helgi og tekur á móti ÍR í 12. umferð Olísdeildarinnar. KA/Þór er í 6. sæti deildarinnar með níu stig eftir fyrstu 11 umferðinar, en ÍR er í 3. sætinu með 14 stig. Fyrri leikur liðanna í deildinni endaði með eins marks sigri ÍR, 30-29, í Breiðholtinu í byrjun október.

• Olísdeild kvenna í handknattleik, 12. umferð
  KA-heimilið kl. 16
  KA/Þór - ÍR

- - - 

Áfram heldur Ofurhelgin í íshokkíinu og á laugardag mætast Reykjavíkurliðin tvö í Skautahöllinni á Akureyri. Ofurhelgarnar eru settar þannig upp að gestgjafarnir hverju sinni eiga frídag á milli leikjanna, spila á föstudegi og sunnudegi, en gestaliðin spila annars vegar á föstudegi/laugardegi og hins vegar á laugardegi/sunnudegi.

• Toppdeild karla í íshokkí, Ofurhelgi 2
  Skautahöllin á Akureyri kl. 16:45
  SR - Fjölnir

- - -

Línur skýrast í riðlakeppni A-deildar karla í Kjarnafæðimótinu um komandi helgi.

• Kjarnafæðimótið í knattspyrnu, A-deild karla
  Boginn kl. 17
  Þór - KFA 

SUNNUDAGUR 11. JANÚAR - fótbolti, íshokkí

Lokaleikur í riðlakeppni A-deildar karla í Kjarnafæðimótinu eru á dagskrá á sunnudag og verður þá endanlega ljóst hvaða lið mætast í undanúrslitum.

• Kjarnafæðimótið í knattspyrnu, A-deild karla
  Boginn kl. 15
  Þór2 - Dalvík

 - - -

Þriðji og síðasti leikur Ofurhelgarinnar er á dagskrá síðdegis á sunnudag með toppslag SA og SR.

• Toppdeild karla í íshokkí, Ofurhelgi 2
  Skautahöllin á Akureyri kl. 18:45
  SA - SR