Umræðan

Ná KA-strákarnir að rétta úr kútnum?

Skapti Hallgrímsson skrifar 29. maí 2023 | kl. 12:30

Hallgrímur Mar Steingrímsson til hægri, í fyrsta leik á Íslandsmóti á nýja Greifavellinum sunnan við KA-heimilið 16. júní á síðasta ári. Hann gerði fyrsta deildarmark KA á vellinum. Ljósmynd: Þórir Tryggvason.

KA tekur á móti Fram í dag í Bestu deildinni, efstu deild Íslandsmótsins í knattspyrnu. Leikið verður á Greifavellinum sunnan við KA-heimilið og Einar Ingi Jóhannsson flautar til leiks stundvíslega klukkan 16.00.

Tæpt ár er síðan fyrsti leikur KA-manna á Íslandsmóti fór fram á vellinum og Framarar voru einmitt fyrstu gestirnir. Þeir bláklæddu höfðu 2:0 forystu í hálfleik en Hallgrímur Mar Steingrímsson (víti) og Daníel Hafsteinsson skoruðu á lokakaflanum og liðin fengu hvort sitt stigið.

Uppskera KA er mun rýrari það sem af er sumri en vonir stóðu til; liðið er í sjötta sæti með 11 stig að loknum níu leikjum. Þrír síðustu leikir hafa farið illa; töpuðust allir og markatalan er 0:10. Bæði Valur og Víkingur unnu 4:0 á Greifavellinum og Breiðablik sigraði KA 2:0 í Kópavogi.

Fram er í níunda sæti deildarinnar með átta stig eftir átta leiki.

Til baka í umræðuna