Lögreglan: Stutt í sektir fyrir naglana

„Við erum farin að hvetja fólk til þess að drífa sig að skipta úr nöglunum,“ segir Margeir Björgvinsson, varðstjóri á Akureyri, í samtali við blaðamann Akureyri.net. Enn ber á því að vegfarendur keyri um á nagladekkjum, en samkvæmt lögum er bannað að vera á nöglum frá 15. apríl, en Margeir segir að lögreglan gefi mikinn slaka á þessari dagsetningu í takt við veðurfar.

„Við erum ekki byrjuð að sekta, en það fer að styttast í það,“ bætir Margeir við. „Nú hefur verið gott veður um nokkurt skeið og stefnir í gott veður áfram, þannig að það er sannarlega tímabært að drífa sig í dekkjaskipti ef einhverjir eru ennþá á nöglum.“

Blaðamaður forvitnast um það, hvort að lögreglan sé með eitthvað plan, einhvern óskrifaðan dag í kladdanum þar sem byrjað er að sekta og olnbogarýmið er þrotið. „Nei, það er í raun ekki þannig,“ segir Margeir. „Við miðum þetta algjörlega út frá veðrinu hvert ár, og byrjum á því að pikka í fólk áður en við förum að sekta.“