KA-strákarnir töpuðu fyrir PAOK – MYNDIR

Fyrri leikur 2. flokks KA í knattspyrnu gegn gríska liðinu PAOK í annarri umferð Evrópudeild ungmennaliða 19 ára og yngri fór fram í Boganum í gærkvöld.  Gestirnir eru með feikisterkt lið og fóru með 2:0 sigur af hólmi. Seinni leikurinn verður í Grikklandi þann 5. nóvember.

Líklega verður veðurfarið útileiknum örlítið betur fallið til knattspyrnuiðkunar en var á Akureyri í gær. Eins og greint var frá í fréttum þurfti að færa leik liðanna inn í Bogann eftir að linnulaus snjókoma gerði það að verkum að ekki tókst að gera gervigrasvöll KA leikfæran.

• Evrópuleikur í dag – 20 cm jafnfallinn snjór
• Evrópuleikurinn verður í Boganum klukkan 16

Grísku gestirnir voru betri aðilinn í leiknum framan af og komust yfir strax eftir 7 mínútna leik, þegar Konstantinos Toursounidis komst allt of auðveldlega gegnum vörn KA og skoraði. Grikkjarnir réðu gangi mála að mestu í fyrri hálfleik en KA fór þó að sækja í sig veðrið undir lok hálfleiksins, án þess þó að ná að skapa einver góð færi.

Eftir 7 mínútna leik í seinni hálfleik kom annað mark gestanna og aftur var það Konstantinos Toursounidis sem var á ferðinni. KA-strákarnir reyndu sitt til að minnka muninn og hefðu með smávegis heppni getað skorað. Meðal annars vildu þeir fá vítaspyrnu um miðjan seinni hálfleikinn en sænski dómarinn var á öðru máli. Lokatölur 2:0 og það er munur sem KA þarf að vinna upp úti í Grikklandi, til þess að komast áfram í 3. umferð keppninnar.

• Leikskýrslan á vef KSÍ - bara nöfn KA-strákanna
• Leiklýsing og nákvæm leikskýrsla á vef UEFA 

Byrjunarlið KA í Evrópuleiknum í gær. Aftari röð frá vinstri: Agnar Óli Grétarsson, Almar Örn Róbertsson, Viktor Máni Sævarsson, Gabriel Lukas Freitas Meira, Þórir Hrafn Ellertsson og Jóhann Mikael Ingólfsson Fremri röð frá vinstri: Kristján Breki Pétursson, Sigmundur Logi Þórðarson, Halldór Ragúel Guðbjartsson, Andri Valur Finnbogason og Valdimar Logi Sævarsson.