Götulokanir, drónabann og hundarnir heima

Það hefur líklega ekki farið framhjá Akureyringum að fram undan um helgina er Akureyrarvaka, með um 100 viðburðum víða um bæinn, en þó verður mest um að vera í miðbænum og nágrenni. 

Að venju verður tilteknum götum lokað vegna þeirra viðburða og mannfjölda sem væntanlega sækir miðbæinn um helgina.

• Miðbærinn - lokað frá kl. 12 á föstudag til kl. 9 að morgni sunnudags. Hér er átt við göngugötuna, þ.e. Hafnarstræti frá Kaupvangsstræti að Ráðhústorgi, Ráðhústorgið sjálft, Túngötu, Strandgötu milli Hofsbótar og Ráðhústorgs og Skipagötu milli Hofsbótar og Ráðhústorgs.
• Kaupvangsstræti frá Eyrarlandsvegi niður að Hafnarstræti - Listagilið - lokað frá kl. 12 á laugardag til kl. 9 að morgni sunnudags.
• Mýrarvegur milli Goðabyggðar og Vanabyggðar, sem og Hrafnagilsstræti frá Mýrarvegi að Byggðavegi - lokað kl. 16-19 á laugardag vegna garðtónleika í Hrafnagilsstrætinu. Hrafnagilsstræti þó opið fyrir íbúa í götunni.

Akureyrarbær hvetur fólk til að fá sér ókeypis far með strætisvögnum, nota umhverfisvænar samgöngur og minnir á að fátt er hollara en góð gönguferð. 

Skiljið hundana eftir heima

Í tilkynningu Akureyrarbæjar er vísað í samþykkt Akureyrarbæjar um hundahald:

• Vakin er athygli á því að samkvæmt 12. grein samþykktar Akureyrarbæjar um hundahald er óheimilt að fara með hunda á samkomur eins og Akureyrarvöku.
• Umferð dróna er bönnuð nema með leyfi hátíðarhaldara og flugturns Akureyrarflugvallar.