Fara í efni
Umræðan

Gerðu einhvern glaðan

Gerðu einhvern glaðan

Ég horfi ekki mikið á sjónvarp en eitthvað dregur mig að skjánum um kvöldmatarleytið. Ég horfi á íþróttir á Stöð 2 rétt fyrir sjö, skipti þá yfir og horfi á fréttir á RÚV. Fréttir eru hæpin uppspretta þekkingar og tilgangur þeirra er að búa til æsing og afþreyingu. En það kemur fyrir að einhver lærdómur slæðist með. Á síðustu vikum hefur auglýsing ein verið leikin á að giska tíu sinnum á þeim tiltölulega stutta tíma sem ég horfi á sjónvarpið. Þökk sé netversluninni Boozt þá er ég búinn að læra þetta ágæta lag og ljóð (sem og þjóðin öll):

„The Christmas season / a joyful reason / to click and choose / it gives a boost. / Get fast and free delivery / return with ease, no stress no fees. / Make someone happy, make someone happy.“

Þetta er vel ort, rím og alles. Það örlar meira að segja á stuðlasetningu („fast and free“). Fólkið í auglýsingunni er bæði fallegt og glaðlegt og manni hlýnar um hjartarætur. Mér datt í hug hvort ég gæti þýtt ljóðið og leyft þeim að njóta sem ekki kunna ensku (ég hélt reyndar að texta ætti allt erlent efni á RÚV). Ég verð að viðurkenna að mér brá dálítið þegar ég var búinn að snara orðunum. Ljóðið án lags varð eitthvað svo klént. Ég treysti mér ekki til að viðhalda ríminu og hrynjandinni, kannski er það ástæðan fyrir glansleysinu:

„Það lyftir manni upp á jólahátíðinni að smella og velja. Þú færð sent heim frítt og með hraði og það er ekkert mál að skila, þér að kostnaðarlausu. Gerðu einhvern glaðan, gerðu einhvern glaðan.“

Aðalritari Sameinuðu þjóðanna var ekki glaður í ræðu fyrir skemmstu og hann talaði um að við værum á hraðleið til helvítis. Róa sig aðeins. Maður verður að fá að leyfa sér aðeins; Singles´ Day, Black Friday, þetta er næs krydd í tilveruna og frábært að taka jólainnkaupin snemma og svona.

Árið 2021 sendi Rauði krossinn á Akureyri 187 tonn af fatnaði og annarri vefnaðarvöru í gámum til útlanda. Margt af vörunum hafði aldrei verið notað og var enn í umbúðunum.

Arnar Már Arngrímsson er rithöfundur á Akureyri.

Lautin athvarf 20 ára (22 ára)

Ólafur Torfason skrifar
09. desember 2022 | kl. 14:00

Örugg skref í átt að sjálfbærni

Elma Eysteinsdóttir skrifar
05. desember 2022 | kl. 21:00

Metnaðarfull áætlun fyrir sveitarfélagið

Heimir Örn Árnason skrifar
05. desember 2022 | kl. 20:35

Ánægð með að hlustað var á Samfylkinguna

Hilda Jana Gísladóttir skrifar
05. desember 2022 | kl. 16:55

Aukið fjármagn frá ríkinu breytir stöðunni

Sunna Hlín Jóhannesdóttir skrifar
05. desember 2022 | kl. 16:00

Fjárhagsáætlun Akureyrarbæjar

Jana Salóme Ingibjargar Jósepsdóttir skrifar
05. desember 2022 | kl. 15:45