Garðar Atli varð í 12. sæti í spjótkasti á EM

Garðar Atli Gestsson úr Ungmennafélagi Akureyrar (UFA) varð í 12. sæti í spjótkasti á Evrópumeistaramóti 17 ára og yngri (EMU18) í Rieti á Ítalíu. Hann var nokkuð frá sínu besta í úrslitunum í morgun; kastaði lengst 57,37 metra, spjótið sveif hins vegar 64,94 m eftir lengsta kast hans í undankeppninni í gær og besti árangur Garðars Atla er 65,35 m sem tryggði honum þriðja sæti og bronsverðlaun á Áskorendamóti Evrópu í Mónakó í lok maí.

Finninn Jere Murto hafði mikla yfirburði í keppni dagsins, kastaði rúmum 10 metrum lengra en næsti maður. Lengsa kast Finnans mældist 80,41 m, annar varð Bretinn Edward Scott með 70,02 m og þriðji Jevin Rasanayagam frá Sviss með 69,06.

Garðar Atli kastaði 57,37 m í fyrstu umferð, gerði annað kastið ógilt og spjótið sveif 51,92 m í þriðju tilraun. Hann kastaði ekki oftar því aðeins átta bestu fengu þrjú köst til viðbótar.