Enskukennsla á Suðursal í MA

GAMLI SKÓLI – 16

• Í þessum mánuði eru 120 ár síðan hið gamla, glæsilega skólahús Menntaskólans á Akureyri var tekið í notkun. Akureyri.net birtir af því tilefni einn kafla á dag út mánuðinn úr bókinni Lifandi húsið - saga gamla skólahúss Menntaskólans á Akureyri.

Myndin er tekin á Suðursal árið 1950. Sigurður Líndal Pálsson enskukennari hlýðir sjötta bekk máladeildar yfir, eins og venja var. Fremst sitja Stefán Lárusson frá Miklabæ í Skagafirði, síðar sóknarprestur í Odda á Rangárvöllum, og Jón Dalmann Ármannsson frá Akureyri, starfsmaður Skattstofunnar á Akureyri. Í annarri röð má þekkja Brynjar Valdimarsson, frá Akureyri, síðar lækni á heilsuhælinu í Kristnesi, og Gunnlaug P. Kristinsson, frá Akureyri, starfsmann KEA. Aftast til vinstri er Magnús Óskarsson frá Akureyri, síðar borgarlögmaður í Reykjavík, og Sveinn Skorri Höskuldsson frá Sigríðarstöðum í Ljósavatnsskarði, síðar prófessor í íslenskum bókmenntum við Háskóla Íslands.

Að baki eru gömlu spjaldahurðirnar frá 1922 sem gerðar voru þegar opnað var milli bókasafnsins og Suðursalur var gerður að kennslustofu sem Sigurður skólameistari kallaði í skólaskýrslu fegurstu kennslustofu skólans.

Sigurður Líndal Pálsson fæddist á Ísafirði 1904, varð gagnfræðingur frá skólanum 1925 og stúdent úr Menntaskólanum í Reykjavík 1928, stundaði fyrst nám við háskólann í Kaupmannahöfn en hvarf í janúar 1929 til háskólans í Leeds og síðar háskólans í Manchester og kenndi við skólann 1931 til dauðadags 1964. Sigurður var eftirminnilegur kennari og gekk fast eftir að nemendur læsu og lærðu grein hans.