Umræðan

Bjóða hraðnámskeið í íslensku í sumarbyrjun

Snæfríður Ingadóttir skrifar 22. apríl 2026 | kl. 06:00

Íslenska sem annað mál hefur verið kennt sem staðarnám og í gegnum netið hjá SÍMEY. Í sumarbyrjun verður boðið upp á viku hraðnámskeið sem nýst getur t.d. fólki sem er að flytja á svæðið vegna vinnu í ferðaþjónustubransanum í sumar. Mynd: Unsplash/Brooke Cagle

Hraðnámskeið í íslensku sem annað mál verður í boði í byrjun júní hjá SÍMEY. Um tilraunaverkefni er að ræða en námskeiðið er fyrst og fremst hugsað fyrir fólk af erlendum uppruna sem er að flytja norður á vordögum.

Með þessu móti getur þetta fólk strax sótt grunnnámskeið í íslensku sem annað mál í stað þess að bíða til haustsins eftir því að ný önn hefjist. Samkvæmt upplýsingum á heimasíðu SÍMEY verður farið yfir námsefnið á sjö kennsludögum og verður kennt í sex tíma á dag, þrjá fyrir hádegi og þrjá eftir hádegi.

Vel látið af íslenskukennslunni

Alls hafa 10 námskeið í íslenska sem annað mál, verið kennd á þessari önn í SÍMEY. Ef allt gengur samkvæmt áætlun verða námskeiðin í annarlok um 20 talsins en námskeiðin hafa bæði verið kennd sem staðarnám en einnig á vefnum. Íslenskukennslan er byggð upp í stigum eða þrepum. Námskeið 1 er grunnnámskeið og síðan koll af kolli upp í stig 5.

Í síðustu kennslustund hvers námskeiðs eru nemendur beðnir um að meta námið, bæði námsefnið, kennsluna og frammistöðu kennaranna. Niðurstöður sýna að útkoman er afgerandi jákvæð hvað varðar námskeiðin á þessarri vorönn. Ríflega sjö af hverjum tíu þátttakendum meta kunnáttu sína miklu betri að námskeiðinu loknu og fjórðungur þátttakenda metur kunnáttuna nokkru betri. Kennsluhættir, samskipti við nemendur og undirbúningur kennara fær fimm stjörnur af fimm mögulegum hjá 94-97% nemenda.