Pistlar

Þórsarar steinlágu fyrir meisturum Víkings

Skapti Hallgrímsson skrifar 08. maí 2026 | kl. 23:00

Valdimar Þór Ingimundarson gerir fyrsta mark leiksins; renndi boltanum í tómt markið af stuttu færi eftir sendingu Óskars Þorgþórssonar af hægri kantinum þegar aðeins 10 mínútur voru liðnar. Mynd: fótbolti.net/Hafliði Breiðfjörð

Þórsarar töpuðu 6:0 fyrir Íslandsmeisturum Víkings í Reykjavík í kvöld í Bestu deildinni, efstu deild Íslandsmótsins í knattspyrnu. Eins og tölurnar gefa til kynna höfðu meistararnir mikla yfirburði á heimavelli sínum og sigurinn var vitaskuld afar sanngjarn; Þórsarar áttu nokkra góða sóknarspretti en varnarleikur liðsins í heild var afleitur og Víkingar hefðu getað gert enn fleiri mörk.

Fyrsta markið kom strax á 10. mínútu og eftir tæpan hálftíma var staðan orðin 3:0. Hafi fyrsta markið verið högg var leiknum í raun lokið þegar mörk meistaranna voru orðin þrjú; Víkingsliðið er slík maskína að nánast er ógjörningur er við að eiga eftir að það nær þægilegri forystu.

Valdimar Þór Ingimundarson gerði fyrsta mark leiksins eftir fyrirgjöf utan af hægri kantinum; potaði boltanum í opið markið af stuttu færi.

Besta færi Þórsara í leiknum kom þegar um 20 mín. voru búnar þegar Atli Sigurjónsson sendi boltann Christian „Greko“ Jakobsen sem lék snilldarlega á varnarmann í teignum en Aron Snær Friðriksson markvörður Víkings var snöggur út á móti Dananum og varði skot hans.

Fimm mínútum síðar komust Víkingar í 2:0 eftir einfalda sókn; löng sending varnarmanns fram völlinn, Óskar Borgþórsson lék inn á vítateig og sendi fyrir markið á Elías Má Ómarsson sem skoraði af stuttu færi.

Ekki liðu nema um það bil þrjár mínútur þar til staðan var orðin 3:0. Að þessu sinni var boltinn sendur úr miðri vörninni og skyndilega var Óskar Borgþórsson sloppin einn í gegn og skoraði framhjá Aroni Birki markverði Þórs. Sorglega auðveld mörk.

Staðan var 3:0 í hálfleik, Þórsarar komu býsna frískir út í seinni hálfleikinn en ekki voru nema fimm mín. búnar þegar Karl Friðleifur Gunnarsson gerði fjórða markið. Óskar og Elías Már endurtóku svo leikinn frá því í fyrri hálfleik, gerðu hvor sitt markið og úrslitin því 6:0.

Þórsarar hafa nú tapað þremur leikjum í röð; fyrst 4:0 fyrir Blikum úti, þar sem með ólíkindum var að Þór skoraði ekki í fyrri hálfleik og tölurnar gefa því vart rétta mynd af gangi leiksins, síðan 1:0 fyrir KA þar sem Þórsarar áttu skilið a.m.k. eitt stig, en annað var upp á teningnum í kvöld; Víkingar voru einfaldlega miklu betri.

Þór er í áttunda sæti með sex stig úr jafn mörgum leikjum, liðið hefur unnið tvo en tapað fjórum. Þrír tapleikjanna komu á útivelli gegn liðum sem spáð er toppbaráttu, Breiðablik, KR og Víkingi, og í því ljósi ekki óeðlileg að nýliðar tapi. Þeir áttu þó í fullu trú við Blikana lengst af en höfðu hins vegar ekki roð við KR og Víkingi.

Þórsarar jöfnuðu slæmt met í kvöld; 6:0 er stærsta tap þeirra í efstu deild og sú varð niðurstaðan í þriðja sinn í kvöld. Þór tapaði 6:0 fyrir KR í Reykjavík sumarið 1977, fyrsta árið sem félagið lék í efstu deild, og 6:0 fyrir ÍA á Akranesi sumarið 1993.

Leikskýrslan á vef KSÍ

Staðan í deildinni

Til baka í yfirlit pistla