Skíðagöngukeppni Súlur Vertical á sunnudag

Næstkomandi sunnudag 1. mars fer fram keppni í skíðagöngu á vegum Súlur Vertical. Þrjár vegalengdir eru í boði og fer keppnin fram á skíðagöngusvæðinu í Hlíðarfjalli. Skráningarfrestur rennur út síðdegis á föstudag.

• UPPFÆRT: Upphaflega átti keppnin að fara fram á laugardag 28. febrúar en seint á fimmtudagskvöld var ákveðið að fresta keppninni um 24 tíma vegna óhagstæðrar veðurspár fyrir laugardag.

Skíðagöngukeppni Súlur Vertical á rætur sínar að rekja til Hermannsgöngunnar, sem kennd var við íþróttafrömuðinn og skíðaáhugamanninn Hermann Sigtryggsson. Hún rann á síðasta ári undir hatt Súlur Vertical og undirbúningur og framkvæmd keppninnar er í höndum Skíðafélags Akureyrar.

Súlur Vertical hóf göngu sína sem fjallahlaupakeppni árið 2016 en er nú orðið af þríleik sem samanstendur af skíðagöngu og malarhjólreiðum, auk fjallahlaupsins. Lengsti leggur gönguskíðakeppninnar nefnist Bylur (24 km) og er hún að auki ein af sjö mótum í mótaröð Íslandsgöngunnar. Aðrar vegalengdir sem verða í boði á sunnudaginn eru Mjöll (12 km) og Fönn (4 km).

Súpa, drykkir og aðrar veitingar verða í boði fyrir keppendur að göngu lokinni, auk þess sem keppendur í Byl og Mjöll fá gjafakort í Skógarböðin. Hægt er að skrá sig til leiks á netskraning.is fram til kl. 18 á föstudaginn.

Endurnýjuðu samstarfssamning

Í vikunni var einnig tilkynnt um endurnýjun samstarfssamnings Akureyrarbæjar við Súlur Vertical og gildir samningurinn út árið 2028. Akureyrarbær mun styðja við framkvæmd viðburðanna í þríleiknum meðal annars með vinnuframlagi, ráðgjöf og öryggis- og kynningarmálum. Árlegt framlag Akureyrarbæjar er metið á um 2 milljónir króna. Ásthildur Sturludóttir bæjarstjóri og Birkir Baldvinsson formaður Súlur Vertical, undirrituðu samninginn  sl. mánudag.