Sanngjarnt jafntefli hjá ÍBV og KA

KA og ÍBV skildu jöfn í viðureign liðanna í 15. umferð efstu deildar karla í knattspyrnu í Vestmannaeyjum í dag. Lokatölur urðu 2:2, eftir að ÍBV náði að jafna leikinn undir lokin, einum leikmanni færri.

Heimamenn voru sterkari aðilinn í leiknum framan af og KA-liðið náði ekki að fylgja eftir batnandi frammistöðu í undanförnum leikjum. Nýju mennirnir hjá KA, Adam Ægir Pálsson og André Römer voru báðir í byrjunarliðinu. Lítið fór fyrir Adam í fremstu víglínu en Römer stimplaði sig vel inn með því að skora fyrsta mark leiksins á 35. mínútu. Markið kom eiginlega upp úr engu, Römer var talsvert utan vítateigs þegar hann ákvað að láta vaða á markið. Gott skot meðfram jörðinni sem fór rakleiðis í nærhornið, í stöngina og inn. Að öðru leyti áttu Eyjamenn betri færi í fyrri hálfleik og undir lok hálfleiksins setti Vicente Valor boltann í stöngina á KA-markinu, þar sem Ívar Arnbro Þórhallsson stóð í fjarveru Steinþórs Más Auðunssonar.

Eftir hlé jafnaðist leikurinn nokkuð en heimamenn þó áfram meira með boltann. Jöfnunarmarkið kom á 68. mínútu þegar löng sending kom inn á vallarhelming KA, þar sem Omar Sowe var ásamt Markúsi Mána Péturssyni og Hans Viktor Guðmundssyni miðvörðum KA. Á einhvern ótrúlegan hátt tókst Omari að koma boltanum og sjálfum sér á milli varnartröllanna tveggja, fór síðan framhjá Ívari markverði og renndi knettinum í netið. Ekta framherjamark.

Enn skorar Birgir Baldvinsson

Það tók KA ekki langan tíma að ná forystunni aftur. KA fékk sína fyrstu hornspyrnu í leiknum á 74. mínútu og Hallgrímur Mar Steingrímsson sendi boltann yfir á fjærstöngina þar sem bakvörðurinn sókndjarfi, Birgir Baldvinsson, reis manna hæst og skallaði knöttinn í netið. Fjórða mark Birgis í sumar og hann er næstmarkahæstur í KA-liðinu á eftir Hallgrími Mar.

Tveimur mínútum síðar fékk ÍBV hornspyrnu og í aðdraganda hennar urðu einhverjar stimpingar í markteig KA. Dómari leiksins lyfti rauða spjaldinu og sýndi Omari Sowe það en erfitt var að greina hvað gekk á eða hvað Omar átti að hafa gert af sér. Einum leikmanni fleiri tókst KA ekki að halda forystunni, því á 85. mínútu jafnaði Vicente Valor úr vítaspyrnu, sem dæmd var á Hans Viktor. Það sem eftir lifði leiks sóttu KA-menn grimmt en náðu ekki að nýta sér marktækifærin. Nokkuð sanngjarnt jafntefli varð því niðurstaðan, sem er vonbrigði fyrir bæði lið. Fyrir leikinn var ÍBV tveimur stigum á undan KA og bæði lið hefðu bætt stöðu sína í neðri hluta deildarinnar töluvert með sigri.

KA: Ívar Arnbro Þórhallsson - Guðjón Ernir Hrafnkelsson, Markús Máni Pétursson, Hans Viktor Guðmundsson, Birgir Baldvinsson - Andre Römer (Breki Hólm Baldursson 84.), Jeppe Pedersen (Valdimar Logi Sævarsson 72.), Hallgrímur Mar Steingrímsson - Jakob Snær Árnason (Jakob Héðinn Róbertsson 46.), Adam Ægir Pálsson, Danijel Dejan Djuric.

Næsti leikur KA er grannaslagurinn gegn Þór, mánudaginn 27. júlí.

Leikskýrslan á vef KSÍ

Staðan í deildinni