Ósátt við að lokapróf verði í húsnæði HA

Nemendur í viðskiptafræði við Háskólann á Akureyri eru mjög ósáttir við þá ákvörðun viðskiptadeildar að lokapróf fari fram í húsnæði skólans. Nemendur fengu tölvupóst þess efnis í gær, tveimur vikum fyrir fyrstu lokapróf. Þegar í stað var hafist handa við að safna undirskriftum þar sem skorað er á yfirvöld skólans að halda fjarpróf.

„Nemendur eru ennþá í óvissu hvað varðar próf á prófstað en nokkrir kennarar í HA hafa ákveðið að hafa heimapróf en ekki allir. Þetta er óásættanlegt að halda nemendum í óvissu. Miðað við ástandið í dag, 8. apríl, er útlitið ekki gott hvað varðar að hafa staðpróf en samt vilja kennarar láta á það reyna,“ segir í lýsingunni sem fylgir undirskriftalistanum.

„Við erum mjög ósátt með þessa ákvörðun og þetta er mjög slæmt vegna þess að það er verið að gera upp á milli deilda. Vinkona mín er í iðjuþjálfunarfræði og þau fá öll að taka sín próf heima, eins í sjávarútvegsfræði. Okkur finnst þetta mjög leiðinlegt,“ segir Karen Björnsdóttir, nemandi í viðskiptafræði í HA, sem hóf undirskriftasöfnunina, í frétt á Vísi seint í gærkvöldi.

Karen segir að sálfræðideild hafi enn ekki tilkynnt um prófafyrirkomulag og enn hefur engin tilkynning vegna prófafyrirkomulags borist frá skólanum sjálfum. Karen segir ákvörðun deildarinnar ekki síst koma niður á þeim nemendum sem stunda fjarnám og búa erlendis.

„Þetta hefur líka mjög mikil áhrif á stúdenta erlendis sem hafa kosið HA vegna fjarnámsins og svo þegar staðan í þjóðfélaginu er svona er mjög slæmt að það sé útgöngubann kannski í þeim löndum og þá geta þau ekki tekið þessi próf,“ segir Karen.

Smellið hér til að lesa frétt Vísis.