„Mjög ánægjulegt hve mætingin er góð“

Akureyrarmet í bólusetningu var sett í dag þegar 1.140 voru bólusettir gegn Covid-19 á slökkvistöðinni. Þar með var metið frá því á þriðjudaginn slegið en þá voru rúmlega 1.000 manns bólusettir. Á þriðjudaginn var bóluefni frá Pfizer í sprautunum en í dag var efnið frá AstraZeneca í boði. Fólk fætt 1961 og eldra var boðað á staðinn í dag.

„Mætingin í dag var mjög góð – 85% þeirra sem voru boðaðir komu í bólusetningu, sem er alveg á pari við Pfizer,“ sagði Inga Berglind Birgisdóttir, yfirhjúkrunarfræðingur á HSN á Akureyri við Akureyri.net. „Það er ákaflega ánægjulegt hve margir mættu í dag, ég er ótrúlega ánægð með fólkið okkar og mjög glöð eftir daginn.“

Bólusetning heldur áfram á slökkvistöðinni í næstu viku.