KA féll úr leik í bikarnum gegn Víkingi

KA féll úr leik í bikarkeppni karla í handknattleik, Powerade-bikarnum, eftir 35:28 tap gegn Víkingi á útivelli í gærkvöld. Víkingar voru yfir nánast allan leikinn en KA þó aldrei langt undan. Á síðustu 10 mínútunum slitu Víkingar sig hins vegar frá KA og kláruðu leikinn með sannfærandi sigri.

Jafnt var á flestum tölum framan af leiknum en Víkingar náðu síðan frumkvæðinu og leiddu með 2-3 mörkum fram að hléi. Staðan var 20:17 þeim í vil þegar fyrri hálfleik lauk og KA gerði síðan fyrsta markið í seinni hálfleik. Gestirnir náðu samt aldrei að komast almennilega inn í leikinn, Víkingar áttu alltaf svör og hleyptu KA-mönnum aldrei of nálægt. Í stöðunni 28:26 gáfu Víkingar síðan í og unnu að lokum 7 marka sigur, 35:28.

Víkingur er því kominn áfram í 8 liða úrslitin en KA er úr leik. Dagur Árni Heimisson var sem fyrr atkvæðamestur í sóknarleik KA og gerði 13 mörk. Andri Freyr Friðriksson var með 5 en aðrir náðu sér ekki á strik í sókninni. Vörnin var heldur ekki upp á sitt besta og markvarslan hefur oftast verið betri.

Bjarni Ófeigur meiddur á auga

Bjarni Ófeigur Valdimarsson var fjarri góðu gamni annan leikinn í röð, eftir að hafa meiðst í viðureigninni gegn Valsmönnum þann 25. september. Bjarni Ófeigur fékk þá högg á augað og varð fyrir áverka á augnbotni. Í samtali við Handkastið kemur fram að honum hefur verið gert að halda sig frá allri hreyfingu næstu vikurnar á meðan hann er að jafna sig. „Málið er að ég má ekki fá púlsinn upp því þá getur verið hætta á blæðingu inn í auganu út af þrýstingi og gæti þá misst sjón varanlega,“ sagði Bjarni í viðtalinu við Handkastið. Ljóst er að hann missir af næstu 2-3 leikjum liðsins í það minnsta.