Pistlar

HSN rekin með 36 milljóna króna afgangi

Haraldur Ingólfsson skrifar 11. september 2024 | kl. 10:00

Heilbrigðisstofnun Norðurlands, HSN, var rekin með 36 milljóna króna afgangi á árinu 2023. Þetta kom fram á ársfundi stofnunarinnar í liðinni viku.

Í frétt HSN af fundinum segir meðal annars að árið hafi verið um margt gott hjá stofnuninni. Þrátt fyrir að HSN glími við áskoranir í mönnun, eins og aðrar heilbrigðisstofnanir, sé stofnunin afar heppin með starfsfólk sem helgi sig vinnunni og veiti fyrirtaks þjónustu.

„Heilt yfir gekk árið vel, kannanir sýna að íbúar svæðisins treysta stofnuninni vel og mörg markmið hafa náðst. Framkvæmdastjórn horfir björtum augum til framtíðar. Á árinu 2024 hafa verið mörg mikilvæg verkefni, s.s. stefnumótun og flutningur í nýja heilsugæslustöð á Akureyri en jafnframt mun stofnunin fagna tíu ára afmæli. Framkvæmdastjórn HSN þakkar starfsfólki kærlega fyrir gott samstarf og góð störf í þágu íbúa á Norðurlandi árið 2023,“ segir meðal annars í frétt HSN.

Ársskýrsla stofnunarinnar er aðgengileg á rafrænu formi - sjá hér. Í pistli framkvæmdastjórnar í ársskýrslunni segir meðal annars um mönnunarvanda stofnunarinnar: „Miklar áskoranir voru við mönnun á heilbrigðismenntuðu starfsfólki á árinu og á það við um flestar starfsstöðvar stofnunarinnar. Ein af þeim aðgerðum sem gripið hefur verið til er að taka á móti fleiri nemum og læknum í sérnámi en fjárheimildir leyfa, með það í huga að byggja grunn undir mönnun, til dæmis heimilislækna. Til framtíðar eru meiri líkur á að fá fólk til starfa sem fær menntun í heimabyggð. Er þessi aðgerð byrjuð að skila árangri en breytingar á vinnumarkaði, nýjar kynslóðir með aðrar þarfir sem og fjölmenning krefjast nýrra áherslna og aðgerða og eru því spennandi áskoranir framundan.“

Til baka í yfirlit pistla