Útí dokk

EYRARPÚKINN - 47

Það er gaman að koma heim með þorsk í kippu eða rauðmaga með gulri lifur.

Lognbjarta daga lygnir sólin sjónum í dokkinni en trillur hvíla í festum hálfmánum líkar og maður flatmagar á bryggjunni og skyggnir seiði undir yfirborði.

Gaman að spá í hvað kallarnir koma með fyrir grjótgarðinn en rottur skjótast undan skúrum og grýtum við þær og máfana.

Stundum fær maður hákarl eða rikkling og kraftur í köllum þegar flaskan hefst á loft og bregða bússur stundum bátsverjum í túni.

Brún lykt af þangi og sjórinn eins blár og bókarkápa Sigurðar frá Balaskarði.

Jóhann Árelíuz er rithöfundur og skáld.

• Útí dokk er kafli úr Eyrarpúkanum, gáskafullu skáldverki sem gerist á Eyrinni á Akureyri um miðja síðustu öld. Bókin kom út 2003.