Jóhann Már Leifsson kominn yfir 400 stig

Jóhann Már Leifsson, leikmaður SA Víkinga, íshokkíliðs Skautafélags Akureyrar, náði þeim áfanga um liðna helgi að fara yfir 400 stig á ferlinum. Stigin eru samanlögð mörk og stoðsendingar. Jóhann Már hefur skorað 179 mörk í meistaraflokki og gefið 222 stoðsendingar og því kominn í 401 stig. „Við erum afar heppin að eiga Jóa í okkar röðum,“ er skrifað í stuttum pistli um þetta afrek Jóhanns á Facebook-síðu íshokkídeildar SA.

Til upprifjunar þá var Jóhann Már atkvæðamikill í leikjum helgarinnar, sérstaklega þeim fyrri, þegar litið er til markaskorunar. Hann skoraði fjögur mörk og átti eina stoðsendingu í fyrri leik helgarinnar og svo eitt mark og átti tvær stoðsendingar í þeim seinni, samtals átta stiga helgi hjá kappanum.

Í pistli á vef Íshokkísambands Íslands þegar Jóhann Már var valinn íshokkímaður ársins 2022 kemur meðal annars fram að hann hafi verið lykilmaður í liði SA frá 14 ára aldri, en hann er fæddur 1993. Hann hefur leikið nánast allan sinn feril með SA, ef frá er talið eitt tímabil með Niagra Furey 2011-2012 og eitt tímabil með Motala í Svíþjóð 2015-2016. Auk þess að vera lykilleikmaður í liði SA Víkinga hefur hann einnig leikið með landsliðum Íslands frá unglingsaldri og verið fastamaður og lykilleikmaður í A-landsliðinu. Í safni Jóhanns, auk yfir fjögur hundruð stiga í leikjum með SA, eru svo auðvitað fjölmargir Íslandsmeistaratitlar og aðrar viðurkenningar.