Hallgrímur lætur af starfi þjálfara KA

Hallgrímur Jónasson er hættur sem þjálfari meistaraflokks KA í knattspyrnu. Þetta var tilkynnt á vef KA síðdegis í dag. Hallgrímur, sem hefur verið við stjórnvölinn síðustu fjögur ár, átti eftir eitt ár af samningi en hann og knattspyrnudeild KA „hafa komist að samkomulagi um starfslok Hallgríms,“ eins og það er orðað í tilkynningunni.

KA varð bikarmeistari í fyrsta skipti í sögu félagsins árið 2024 undir stjórn Hallgríms og besti árangur liðsins á Íslandsmótinu var annað sæti í Bestu deildinni 2022. 

Hallgrímur gekk upphaflega til liðs við KA sem leikmaður fyrir tímabilið 2018, eftir farsælan atvinnumannaferil erlendis. Hann var ráðinn aðstoðarþjálfari árið 2020 og lék áfram með liðinu en tók við sem aðalþjálfari um miðjan september 2022 eftir að Arnar Grétarsson hvarf á braut. Hallgrímur stýrði liðinu þá í síðustu fimm leikjunum. 

KA varð í sjöunda sæti Bestu deildarinnar þrjú ár í röð, frá 2023 til 2025 en örlög liðsins í ár voru að falla úr deildinni, eftir að það varð í næst neðsta sæti.

Smellið hér til að sjá tilkynninguna á vef KA