Þórsarar komast áfram með sigri í kvöld

Karlalið Þórs í körfubolta mætir Skallagrímsmönnum í Borgarnesi í kvöld í úrslitakeppni 1. deildarinnar í körfubolta. Með sigri í kvöld komast Þórsarar áfram í undanúrslit; þrjá sigra þarf til þess, Þór hefur þegar unnið tvo leiki en Skallagrímur einn.

Leikirnir hafa allir verið æsispennandi. Skallagrímur vann fyrst í Íþróttahöllinni á Akureyri með tveggja stiga mun, Þórsarar gerðu slíkt hið sama í Borgarnesi og unnu svo heimaleikinn um síðustu helgi með eins stigs mun.

Vinni Skallagrímur í kvöld verður oddaleikur á Akureyri næsta laugardagskvöld.

Leikurinn verður sýndur beint á veo-live rás Skallagríms. Til að horfa þarf að hlaða niður appi í símann og skrá sig inn, en ekkert kostar að horfa.