Þórsarar áfram í átta liða úrslit bikarsins

Þórsarar eru komnir áfram í átta liða úrslit Mjólkurbikarsins eftir 2-0 útisigur á Fjölni í Egilshöllinni nú síðdegis.

Markalaust var í leikhléi, en hinn ungi Ingimar Arnar Kristjánsson skoraði tvívegis í seinni hálfleiknum. Fyrra markið kom eftir tæpan stundarfjórðung í seinni hálfleiknum. Ingimar fékk þá langa sendingu fram og skallaði yfir markvörð Fjölnis og í markið. Tuttugu mínútum síðar kom svo annað markið. Ingimar fékk þá sendingu yfir vörnina og kláraði færið snyrtilega, tók boltann á lofti, í stöng og inn.

Tveggja marka sigur staðreynd og Þórsarar komnir í átta liða úrslitin annað árið í röð. Í fyrra mættu þeir Víkingi úr Reykjavík í átta liða úrslitunum og töpuðu naumlega, 1-2, á heimavelli. Víkingar fóru alla leið og unnu bikarinn.

Dregið verður í átta liða úrslitin þriðjudaginn 21. maí.