Sjáið gosmengun á heimsvísu í vefsjá

Á vef Veðurstofu Íslands er fylgst grannt með eldgosinu í Sundhnúksgígaröðinni, sem og gosmengun sem því fylgir. Mengunin hefur helst lagst yfir Vestfirði og Norðurland, eins og fjallað hefur verið um í frétt Akureyri.net. Rætt var við Hlyn Árnason, loftgæðasérfræðing hjá Umhverfis- og orkustofnun (UOS) en hann sagði skýringuna einfaldlega vera vegna vindátta, sem færi gosmengunina yfir Snæfellsnes og til Vestfjarða og þaðan berist hún út um allt Norðurland. Og vegna stillu í veðrinu hangi þessi gosmóða enn yfir. 

Loftgæði á Akureyri hafa oft verið slæm síðustu daga, samkvæmt vefsjá Umhverfis- og Orkustofnunar. Á vef Veðurstofunnar er hægt að nálgast hlekk sem sýnir gosmengun á heimsvísu. Kortið sýnir hvernig brennisteinsmengun dreifist yfir Evrópu og Atlantshafið dag frá degi, út frá mælingum úr gervihnetti, segir á upplýsingasíðu Veðurstofunnar um gosið og gosmengun.