Umræðan

Samningur í höfn, kynntur á föstudag

Skapti Hallgrímsson skrifar 20. maí 2026 | kl. 14:05

Oddvitar framboðanna sem náð hafa samning um meirihlutasamstarf í bæjarstjórn Akureyrar; Sunna Hlín Jóhannesdóttir Framsókn, Berglind Ósk Guðmundsdóttir Sjálfstæðisflokki og Óðinn Svan Óðinsson L-lista. Myndir: Skapti Hallgrímsson

Sjálfstæðisflokkur, L-listi og Framsókn hafa náð saman um myndun meirihluta í bæjarstjórn Akureyrar næstu fjögur ár skv. heimildum akureyri.net. Sömu heimildir herma að þetta verði tilkynnt í dag og að málefnasamningur verði svo kynntur á föstudaginn.

Hvert þessara framboða fékk 2 bæjarfulltrúa kjörna á laugardaginn en 11 sitja í bæjarstjórn Akureyrar.

Sjálfstæðisflokkur (2) og L-listi (3) voru í meirihlutasamstarfi með Miðflokki (1) á nýliðnu kjörtímabili.

Verkaskipting liggur fyrir og mikil samstaða um málefnin, að sögn heimildamanns akureyri.net. „Mikið jafnræði er innan hópsins, við ætlum að leiða bæinn áfram í sameiningu og skýrt plan er um hvert við stefnum,“ segir hann. Hvað þetta þýðir – hvert stefnan verður tekin – kemur ekki formlega í ljós fyrr en á föstudag.

Öll þrjú framboðin fengu 2 bæjarfulltrúa sem fyrr segir. Þeir eru:

Sjálfstæðisflokkur (19,4%) – Berglind Ósk Guðmundsdóttir og Heimir Örn Árnason
L-listi (19,3%) – Óðinn Svan Óðinsson og Brynja Hlíf Þorsteinsdóttir
Framsókn (15,1%) – Sunna Hlín Jóhannesdóttir og Gunnar Már Gunnarsson

L-listinn hefur verið í meirihluta í bæjarstjórn Akureyrar undanfarin 16 ár, allt frá kosingunum 2010 þegar framboðið fékk hreinan meirihluta – sex bæjarfulltrúa. Það hafði engu stjórnmálaafli tekist í sögu Akureyrar og hefur ekki gerst síðan. Framsókn var síðasta í meirihluta kjörtímabilið 2018 til 2022 (ásamt L-lista og Samfylkingu) og Sjálfstæðisflokkurinn var í meirihluta á nýliðnu kjörtímabili sem fyrr segir en þar áður síðast kjörtímabilið 2006 til 2010.

Fréttin hefur verið uppfærð. Nánar síðar

Til baka í umræðuna