Rut Arnfjörð Jónsdóttir í viðræðum við Hauka?

Handboltavefur Íslands, handbolti.is, greindi frá því í gær að Rut Arnfjörð Jónsdóttir, sem leikið hefur undanfarin fjögur tímabil með KA/Þór í Olísdeildinni í handknattleik, sé sterklega orðuð við vistaskipti til Hauka og hafi verið í viðræðum við félagið. Þetta kveðst handboltavefurinn hafa eftir heimildum. Bent er á í frétt handboltavefsins að Hauka hafi sárlega vantað örvhenta skyttu eftir að Ingeborg Furunes sleit krossband í annarri umferð Olísdeildarinnar í haust.

• Rut sterklega orðuð við Hauka | Handbolti.is

Það þarf auðvitað ekki að koma á óvart að Rut hyggist hafa vistaskipti og spila fyrir sunnan því sambýlismaður hennar, Ólafur Gústafsson, sem leikið hefur með KA undanfarin ár, skipti á dögunum í uppeldisfélag sitt, FH. Haukar eru hins vegar sterkara liðið í handboltanum hjá konunum í Hafnarfirði. FH spilar í næstefstu deild, Grill 66 deildinni. Þar hafnaði liðið í 5. sæti og beið lægri hlut fyrir Aftureldingu í undanúrslitum umspils um sæti í Olísdeildinni.