Klakabúnt á neðsta palli kirkjutrappanna

Akureyringar fögnuðu skömmu fyrir jól þegar endurnýjaðar tröppur við Akureyrarkirkju voru teknar í notkun við hátíðlega athöfn. Glæsileg framkvæmd sem að vísu tók tímann sinn og tafðist mjög af ýmsum ástæðum. Vegfarendur hafa þó tekið eftir því í vetrarveðrinu að undanförnu að þrátt fyrir snjóbræðslukerfi og auðar tröppur situr klakabúnt á neðsta pallinum, einmitt þar sem handriðið sem liggur eftir miðjum tröppunum endar. Það stendur þó til bóta. 

Samkvæmt upplýsingum frá umhverfis- og mannvirkjasviði Akureyrarbæjar var ekki hægt að fara í framkvæmdir á neðsta pallinum samhliða tröppuframkvæmdunum, en Sigurður Gunnarsson, verkefnisstjóri nýframkvæmda, segir að farið verði í þetta verk á næstunni. Fram að því verði reynt að halda pallinum hreinum og hálkufríum með hreinsun og söndun. Sigurður segir snjóbræðsluna í tröppunum virka mjög vel og verði gott að ná þessum palli í sömu virkni.

Sigurgeir Haraldsson, pípulagningamaður á eftirlaunum og áhugaljósmyndari, greip til myndavélarinnar þegar hann átti leið um tröppurnar núna í vikunni, áður en sunnanvindurinn og hlákan heimsóttu bæjarbúa.