KA/Þór tekur á móti Stjörnunni í bikarnum

Stelpurnar í handboltaliði KA/Þórs hafa nóg að gera þessa vikuna, nýbúnar að vinna FH, eru í toppsæti Grill 66 deildarinnar og í dag er komið að leik í 1. umferð bikarkeppninnar, Powerade-bikarsins, þegar þær taka á móti liði Stjörnunnar. Leikurinn verður í KA-heimilinu og hefst kl. 17:30.

Segja má að leikurinn í dag sé í 16 liða úrslitum bikarkeppni kvenna þó þátttökuliðin séu aðeins 14. Sex leikir eru spilaðir í 1. umferðinni, en Íslandsmeistarar Vals og Haukar, sem spila í Evrópukeppni, sitja hjá og koma beint inn í átta liða úrslitin.

KA/Þór er sem fyrr segir á toppi næstefstu deildar kvenna, Grill 66 deildinni, en Stjarnan spilar í efstu deild, Olísdeildinni, og er þar sem stendur í 6. sæti af átta liðum.

• Powerade-bikar kvenna
  KA-heimilið kl. 17:30
  KA/Þór - Stjarnan

Aðrar viðureignir í 16 liða úrslitunum:

• FH – Grótta
• HK – ÍBV
• Selfoss – Fram 19-26
• Afturelding – ÍR
• Víkingur – Fjölnir