Handbolti: KA vann FH með yfirburðum

KA gerði góða ferð til Hafnarfjarðar í kvöld í 8. umferð efstu deildar karla í handknattleik, Olísdeildinni, og lagði heimamenn í FH örugglega að velli, 39:33. KA var með forystuna allan tímann og komst með sigrinum upp í 2. sæti deildarinnar. Liðið hefur nú 12 stig, eftir sex sigurleiki og tvo tapleiki.

FH-ingar hafa líka farið vel af stað í deildinni og höfðu aðeins tapað einum leik í fyrstu sjö umferðunum. En það er óhætt að segja að þeir sáu aldrei til sólar í þessari viðureign. Eftir 10 mínútna leik var KA komið með fimm marka forystu, 8:3, og tvö af þessum þremur mörkum heimamanna komu úr víti. Staðan í leikhléi var 20:17 fyrir KA og Dagur Árni Heimisson var kominn með 8 mörk.

KA-menn létu síðan kné fylgja kviði eftir hlé og FH-ingar áttu engin svör. Ágúst Elí Björgvinsson var í miklu stuði í markinu, Arnór Ísak Haddsson kom inn á og skoraði fimm mörk og Bjarni Ófeigur Valdimarsson fann líka fjölina sína og deildi að auki út stoðsendingum. Munurinn var kominn upp í sjö mörk um miðjan seinni hálfleikinn. Mestur varð munurinn níu mörk, 35:26, en lokatölur urðu 39:33.

Frábær leikur hjá KA, sem kemur í kjölfar annars frábærs leik gegn Aftureldingu fyrir nokkrum dögum. Eins og áður sagði átti Ágúst Elí stórbrotinn leik í markinu og lokaði því á löngum köflum. Hann varði alls 21 skot, þar af tvö vítaskot frá fyrrum liðsfélaga sínum, Einari Rafni Eiðssyni, og var með 44% markvörslu. Dagur Árni endaði með 12 mörk og Bjarni Ófeigur var með 7 mörk og jafnmargar stoðsendingar.

Það verður síðan sannkallaður toppslagur í næstu umferð þegar KA tekur á móti Haukum á laugardaginn kl. 18:30 en Haukar hafa unnið fyrstu 8 leiki sína í deildinni og eru á toppnum með 16 stig. KA og Valur koma þar á eftir með 12.