Hallgrímur og Hans valdir í landsliðið

Þeir Hallgrímur Mar Steingrímsson og Hans Viktor Guðmundsson úr KA eru báðir í landsliðshóp Íslands í knattspyrnu sem mætir Mexíkó ytra í vináttulandsleik þann 26. febrúar. Tuttugu leikmenn eru í hópnum og leika þeir allir með íslenskum liðum nema einn.

Arnar Gunnlaugsson landsliðsþjálfari tilkynnti landsliðshópinn í dag en vegna þess að leikurinn fer fram utan hefðbundinna landsleikjaglugga eru leikmenn úr flestum deildum Evrópu ekki til taks. Hvorki Hallgrímur Mar né Hans Viktor hafa leikið A-landsleik en Hans á að baki 12 leiki með U-21 landsliðinu árin 2017-2018.

Ísland og Mexíkó hafa fimm sinnum áður mæst í vináttulandsleik og enn hefur Ísland ekki náð að sigra og aðeins tvívegis náð jafntefli. Mexíkó er í 16. sæti heimslistans í knattspyrnu og undirbýr sig nú fyrir lokakeppni HM í sumar en Ísland er í 74. sæti. 

Daníel Hafsteinsson, sem er uppalinn KA-maður en leikur nú með Víkingi, var einnig valinn í landsliðshópinn. Leikurinn fer fram í Queretaro í Mexíkó og hefst kl. 2 að íslenskum tíma aðfaranótt 26. febrúar.