Hafþór Már Vignisson snýr aftur í raðir Þórs

Hafþór Már Vignisson hefur samið við handknattleiksdeild Þórs og mun leika með liðinu á næsta tímabili. Þetta tilkynntu Þórsarar á Facebook-síðu deildarinnar fyrir nokkrum mínútum. Hafþór er örvent skytta, en Þórsara hefur einmitt vantað leikmann í þá stöðu.

Hafþór er uppalinn í Þór, en lék síðast með Akureyri handboltafélagi hér fyrir norðan áður en hann gekk til liðs við ÍR vorið 2019. Þaðan fór hann í Stjörnuna þar sem hann var í tvö ár, en hélt síðan utan til Þýskalands í atvinnumennsku og lék með HC Empor Rostock í þýsku 2. deildinni áður en hann snéri til Noregs. Hann er nú á heimleið og reynir fyrir sér í Grill 66 deildinni á komandi tímabili með uppeldisfélaginu. 

• Hafþór Vignisson semur við Rostock | akureyri.net

Hafþór hefur nú ákveðið að snúa heim á æskuslóðirnar og spila með Þórsurum í Grill 66 deildinni á næsta tímabili, en þeir voru nánast hársbreidd frá því að vinna sér sæti í Olísdeildinni í úrslitaeinvígi við Fjölni í vor. Þórsarar safna nú liði, en á dögunum samdi handknattleiksdeildin við Odd Gretarsson, eins og Akureyri.net greindi frá. 

• Oddur Gretarsson er á heimleið í Þór | akureyri.net