Forstjóri Samherja kynnti „Besta bitann“

Sala á þorskhnökkum frá Samherja hófst í verslunum hérlendis í síðustu viku – eins og akureyri.net sagði frá hér – og segja má að það sé söguleg stund í liðlega 40 ára sögu fyrirtækisins vegna þess að hingað til hefur allur hvítfiskur frá Samherja verið seldur úr landi.

Baldvin Þorsteinsson, forstjóri Samherja, mætti í verslun Bónus á Norðurtorgi í tilefni dagsins og kynnti „Besta bitann af þorskinum“ eins og varan er kölluð. Forstjórinn segir hana sannarlega standa undir nafni. „Þorskhnakkar er það besta sem við höfum upp á að bjóða, og ég er mjög stoltur af því að við séum farin að selja vöruna innanlands,“ sagði Baldvin við akureyri.net. Hann kvaðst ánægður með að verslanir hafi viljað taka vöruna til sölu en þar er um að ræða Bónus, Krónuna og Nettó.

Baldvin, Theódór Sölvi Haraldsson matreiðslumaður hjá ÚA og Sunneva Ósk Guðmundsdóttir framleiðslustjóri Samherja, kynntu viðskiptavinum Bónus á Norðurtorgi vöruna og buðu fólki að smakka.

Tvö ár eru síðan Samherji hóf sölu á bleikju og laxi frá eldisstöðvum félagsins í íslenskum verslunum. Sala á ferskum Landlaxi og ferskri Landbleikju frá Samherja fiskeldi hefur gengið vel og m.a. þess vegna var ákveðið að stíga það skref að bjóða einnig þorskhnakka á íslenskum neytendamarkaði.